Naʻe fakaʻilongaʻi ʻe he fetuʻu ‘o mala’e akapulu, Daniel Tupou ʻene aʻu ki he vaʻinga hono 300 maʻá e Kalapu Sydney Roosters. Ko e makamaile fakahisitōlia eni kuo ne aʻusia hili ha taʻu ʻe 15 ʻene tauhi mateaki ki he kalapú. Tautefito pe ki hono tataki ‘ae Roosters ‘i he ikuna ‘aki e poini 28 kihe 12 ‘a e timi Eels.
Naʻe kau atu ki he kātoanga fakalangilangi ko ʻení ʻa e Taʻahine Pilinisesi Angelika Latufuipeka Tukuʻaho fakataha mo e ʻEiki Palēmia ʻo Tonga Lord Fakafanua, ke fakahaaʻi ʻenau poupou mo e fiefia ‘i he lavameʻa kuo aʻusia ʻe he matapule Tonga ko ʻení.
Ko e matapule vainga fakaholomamata eni, ‘i he malae ‘o e ‘akapulu liiki (rugby league). Pea oku pehe pe ‘ehe kau poupou tokolahi koe tangata ‘eni ‘o e ataa, he koe taimi oku kakapa ai ki he pulu ‘akapulu ‘i he mala’e va’inga ‘oku ‘ikai ke toe ofi hake ha taha. Ko ‘ene ta’u 35 eni, pea oku ne va’inga ‘i he tu’unga ko e kapakau ma’ae Sydney Roosters. Ko e matapule hono 5 eni ke fakakakato e fo’i va’inga e 300 ma’ae Sydney Roosters.
Kuo hoko ʻa Daniel Tupou ko ha tokotaha ʻoku ʻikai ngata pē ʻi hono fakaʻapaʻapaʻi koeʻuhí ko ʻene ngaahi lavameʻa ʻi he malaʻe vaʻingá, ka ʻoku toe ʻofeina foki ia koeʻuhí ko hono ʻulungaanga anga-fakatōkilalo mo hono fakafofongaʻi lelei ʻo Tonga. Ko ʻene aʻusia ko ʻení kuo hoko ia ko ha meʻa fakafiefia ki hono fāmilí pea pehē foki ki he kakai Tonga kotoa.
ʻOku mau fakahoko atu ʻa e talamonū mo e fakamālō kia Daniel Tupou ʻi he makamaile mahuʻinga ko ʻení, pea ʻoku toe fakahaaʻi foki ʻa e houngaʻia ki he Puleʻanga ʻAositelēliá mo e Kalapu Sydney Roosters ʻi hono fakaafeʻi mo talitali lelei ʻa e kau fakafofonga mei Tonga ʻi he kātoanga fakalangilangi ko eni.
