Na’e faka’ilonga’i ‘i he Falemahaki Vaiola´, ‘aho 25 Sepitema 2026´, ha Makamaile ‘o e Tokangaekina e Mo’ui Lelei ‘i Tonga ni ‘aki hono huufi ‘a e Anthroplasty Project mo hono fakaava faka’ofisiale ‘o e va’a Central Sterile Services Department – ‘a ia ko e va’a eni ‘oku ne tokangaekina hono fufulu, haka mo fakapapau’i ‘oku lelei e tu’unga ma’a ‘o e ngaahi me’angaue ‘oku ngaue’aki ‘i loki tafa´. Na’e malava ‘a e ngaue ko eni´ ‘i he fengaue’aki hoa ngaue mo e Siasi ‘o Sisu ‘o e Kau Ma’oni’oni ‘o e Ngaahi ‘Aho ki Mui ni´, ko e Kalapu Lotali ‘o Whanganui North, Nu’usila mo e Potungaue Mo’ui ‘a Tonga´ pea ‘oku fakahoata heni ‘a e ngaue tukupa ki hono fakalakalaka’i e ngaahi fakaola ngaue e ngaahi taumu’a ngaue ‘o e tokangaekina ‘o e mo’ui lelei´ pea mo e fakamalohinga e ngaahi sevesi ‘a e Potungaue Mo’ui´ ‘i Tonga ni´.
Na’e kau ‘i he polokalama huufi ko eni´ e ngaahi lea mei he Pule’anga´ mo e kau taki ‘o e Potungaue Mo’ui´, kau fakafofonga mei he Kalapu Lotali´, ‘Eleta Siale Eliesa, mo e fakafofonga mei he Siasi ‘o Sisu Kalaisi´. Na’e kau atu ‘a e kau fakaafe´ ki he ouau kosi lipine´ pea mo e lava atu ‘o vakai ki he ngaahi fakalelei na’e fakahoko ki he Va’a CSSD ko eni´.
Ko e Va’a ko eni´, hili ange hono toe fakalelei’i´, ‘e lava ia tokoni’i lelei ‘a e kau taukei ngaue ‘i he tafa’aki ko eni´ ‘aki hono ‘oatu ‘a e fa’unga ngaue kuo fakalakalaka’i ki hono haka mo fakama’a ‘a e ngahai me’angaue ki he loki tafa´ pea mo hono fakapapau’i ‘oku malu mo toe lelei ange hono fakahoko ‘a e ngaahi faito’o tafa´ ‘i Tonga ni.
‘Oku toe fakamahino ‘e he ngaue ko eni´ ‘a e ivi mo e laumalie ‘o e ngaue fakataha´ ki hono tapuekina ‘a e ngaahi mo’ui ‘i Tonga ni´ mo hono fakatupulaki ai pe ‘o e ngaahi komiuniti malohi mo mo’ui lelei ange´.
