‘I he ‘aho Tusite 22 Sepitema 2026, na’e folau atu ai e kaunanga ko Māsina Seilose Fonua ki Malta ke hoko atu ‘ene feinga ako ki hono Masters in International Maritime Law ‘i he University of Malta, International Maritime Law Institute. Ko e faingamalie ako eni ‘oku fakapa’anga ‘e he Nippon Foundation Fund mei Siapani pea ‘oku kamata faha’i ta’u ako ‘a Masina´ ‘i he uike ‘uluaki ‘o ‘Okatopa 2026´.
Ko e Sikolasipi ko eni´, ko e toko tolu pē ‘i Tonga ni kuo nau ta’imālie ai. Ko e ‘uluaki ko ‘Eiki Nōpele Fielakepa, kuo ne pekia´, ua ki ai ‘a ‘Elisiva ‘Akau’ola ko e ‘ofefine ‘o ‘Aisea ‘Akau’ola mo Lavina ‘Akau’ola mei Malapo pea ko e fika tolu pē eni ‘a Māsina Seilose Fonua.
Ko Māsina Seilose Fonua´, ta’u 26, ko e loea ‘i he Potungaue Fakamaau’anga ‘o Tonga mei Tatakamotonga, Fua’amotu, Ha’asini, ‘Eueiki, Kolonga, Niutoua, Lotofoa mo Nomuka Ha’apai. Ko e ‘ofefine fika eni ‘o Falekaono Fonua ko e ‘Ofisa Ako Mā’olunga ‘i he Potungāue Ako´ mo e Ako Ngāue ‘a e Pule’anga Tonga´ mei Tatakamotonga, Lapaha pea mo Eileen Fonua ko e Tokoni Talēkita e Potungaue Fakamaau’anga ‘o Tonga´ mei Fua’amotu, Ha’asini mo Nomuka Ha’apai. Ko e fānau ‘a Falekaono mo ‘Eileen Fonua´, ‘oku ‘i ai ‘a e toko tolu fefine lalahi pea si’isi’i taha ‘a hona foha. Ko Māsina´ ko e ‘ofefine lahi taha´ ia pea fika ua ‘a ‘Analupe Fonua ‘oku ne fakahoko fatongia ‘i he Fakamaau’anga Polisi´ mo ako lao pē mo ia. Ko e fika tolu´ ko Sela ‘Anaumelie-‘i-Laucala Fonua ‘oku lolotonga ako lao ‘i he sikolasipi ‘i USP ‘i Fisi pea te na folau atu ki Vanuatu ‘i he ta’u fo’ou ke fakakakato ai ‘ena feinga ako ki hona mata’itohi lao´. Ko e si’isi’i taha ko ‘Alifaleti Falekaono Victor e Fononga Teau Nimanoa Jr. Fonua ‘oku ako ‘i he Tonga Side School.
‘I he kakato ‘a e feinga ako ‘a Māsina´ ‘e foki mai ‘o fakahoko fatongia ‘i he Potungāue ‘o e Ngaahi Ngāue Lalahi´ (Ministry of Infrastructure) ‘i he tafa’aki ‘o e Maritime and administration. Ko e faka’amu ia ‘a e ongo matu’a ni ki he ako ‘a ‘ena ki’i fanau, ke ‘ilo’i ‘a Kalaisi pea ‘ai ke ‘iloa, Saame 119 veesi 105 pea ke ‘o’ona pe ‘a e Langilangi´ mo e Kolōlia´.
‘Oku ‘oatu ‘a e fakamalo loto hounga mo’oni ‘a e ongo matu’a ni kia Faifekau Penisimani ‘Akau’ola Tonga pea mo e Famili ‘o e Kautaha Lau Tohitapu´ ‘i he lotu mo e hufaki ‘o ta’imalie ai e ‘ofefine ko eni´ ‘i he faingamālie ako kuo ne ma’u ki Malta ki he fakakakato ‘e ne mata’itohi Masters in International Maritime Law. Ko e faka’amu ia ‘a e ongo matu’a ni ke nau foki mai pe ‘o ngaue’i hotau Pule’anga´ ‘oka hili ‘enau feinga ako´.
‘Oku ‘oatu heni ‘a e talamonū kiate koe Masina Seilose Fonua pehē kia ‘Analupe Fonua mo Sela Fonua ‘i he feinga ako ‘oku mou fakahoko´. Fakatauange ke tataki ‘a ho’o mou feinga ako ‘e he Ta’e-Hā-Mai´ pea ke ne malu’i ma’u aipe kimoutolu.
