‘I he ‘aho 4 Sepitema 2026, na’e ma’u ai ‘e he ‘Ofisa Pule Ngaue ‘o e 88.1FM Letio ‘a e Kakai pea mo e Kalonikali Tonga´ e Tu’utu’uni Fakataimi ‘a e ‘Eiki Fakamaau Lahi Hon. Malcom Bishop KC, CV45 2026, fekau’aki mo hono vahe’i ki tu’a ‘a e 88.1FM Letio ‘a e Kakai mo e Kalonikali Tonga´ mei he fakataha ‘a e ‘Ofisi ‘o e Palemia´ pea mo e ngaahi kautaha faiongoongo ‘o pehe ‘i hono liliu ki he lea Faka-Tonga´:
‘I HE FAKAMAAU‘ANGA LAHI ‘O TONGA
MAFAI FAKASIVILE
FAI’ANGA LESISITA NUKU‘ALOFA
CV 45 ‘o e 2026
‘I HE VAHA’A ‘O:
‘ETUATE LAVULAVU
‘Ofisa Pule Fakahoko Gāue ‘o e Tonga Chronicle (Kalonikali Tonga) pea mo e 88.1 FM Letio ‘a e Kakai (People’s Radio Tonga), ko e ngaue’anga ‘oku fakalele ‘e he Takiama Companies Limited
Tokotaha Talatalaaki (Plaintiff) / Tokotaha Tohi Kole (Applicant)
PEA MO E:
PALEMIA ‘O TONGA
‘Uluaki Faka‘iloa – First Defendant / Respondent
PEA MO E:
PULE‘ANGA ‘O TONGA
Faka‘iloa Hono Ua – Second Defendant / Respondent
KO E NGAAHI TU‘UTU‘UNI FAKATAIMI
‘I HE ‘AO ‘O E ‘EIKI FAKAMAAU LAHI´ – BISHOP KC
HILI HONO MA‘U e kole – (ex parte) – mei he tafa’aki ‘o e talatalaaki´ ki ha ngaahi tu‘utu‘uni fakataimi fakavavevave ma‘ae Talatalaaki ‘o ‘ikai ha fakatokanga ki he Kau Faka‘iloa´, ko e fakamatala fuakava (affidavit) ‘a ‘Etuate Lavulavu mo e ngaahi fakamatala fakalahi na’e fakahu fakataha mo ia, na‘e fuakava’i ‘i he ‘aho 3 ‘o Sepitema 2026; PEA mo e fakamatala fuakava (affidavit) ‘a Amanda Amiafolau Loamanu (nee Vaipulu) na‘e fuakava’i ‘i he ‘aho 2 ‘o Sepitema 2026, na‘e faile ke poupou ki ai;
PEA ‘I HE FIEMALIE ko e me‘a ni ‘oku fakavavevave pea ‘oku teu pē ke fai ha fakataha mo e kau faiongoongo ‘a e ‘Ofisi ‘o e Palemia ‘i ha taimi nounou;
PEA ‘I HE tukupa ‘a e Talatalaaki ke ne fua ha ngaahi maumau;
‘OKU TU‘UTU‘UNI HENI :
- Ko e ‘Uluaki Faka‘iloa´, ko ‘ene kau ‘ofisa´, kau sevāniti´, pea mo ‘ene kau fakafofonga´ – ‘oku ta‘ofi kinautolu mei hono fakafisinga’i ‘o e Talatalaaki´ pea mo e kau faiongoongo mo e kau ngāue ‘o e Tonga Chronicle (Kalonikali Tonga) pea mo e 88.1 FM Letio ‘a e Kakai´ ke hu ‘o kau atu ki ha fa‘ahinga fakataha mo e kau faiongoongo ‘oku fakahoko ‘e he, pe ma’ae, ‘Ofisi ‘o e Palemia´ pe ko e Pule‘anga ‘o Tonga´, ‘i he ngaahi tu‘utu‘uni mo e ngaahi tūkunga tatau pē ‘oku ngāue‘aki ki he kau faiongoongo ‘o e ngaahi kautaha faiongoongo kehe´.
- Ko e Talatalaaki´ pea mo e kau faiongoongo mo e kau ngāue ‘o e Tonga Chronicle mo e 88.1 FM ‘e faka‘atā kinautolu ke nau hū ki he Fale Faka-Pule‘anga St George Government Building ‘i he ngaahi tu‘utu‘uni mo e ngaahi tūkunga tatau pē ‘oku ngāue‘aki ki he toenga ‘o e kakai ‘o e fonua´ pea mo e ngaahi kautaha faiongoongo´.
- Ko e Talatalaaki kuo pau ke ne tufa ki he Kau Faka‘iloa´ ha tatau kuo sila‘i, ‘o e Tu‘utu‘uni ni, fakataha mo e Tohi Faka‘ilo (Writ of Summons) pea mo e Statement of Claim.
- ‘Oku ‘atā ki he Kau Faka‘iloa´ ke nau kole ke kaniseli pe liliu ‘a e ngaahi tu‘utu‘uni ni.
- Ko e Tohi Kole pe Application ‘a e Tokotaha Talatalaaki´ kuo faka’aho ia ke ha ‘i he Fakamaau’anga´ (Hearing) ‘i he ‘aho 11 ‘o Sepitema 2026.
- Ko e ngaahi fakamole´ ‘oku toloi.
HON. MALCOLM BISHOP KC
‘EIKI FAKAMAAU LAHI
NUKU‘ALOFA: 4 SEPITEMA 2026
‘Oku faka’aho ki he ‘aho 11 ‘o Sepitema 2026 ke hā ai ‘a e keisi ni ‘i he Fakamaau’anga´.
‘Oku mahu’inga ke fakatokanga’i heni na’e feinga atu ‘a e Faka’iloa – ‘Etuate Lavulavu, ‘i he ‘aho 19 ‘o ‘Aokosi 2026´, ke puka ha taimi ‘a e ‘Eiki Palemia´ ke na talanoa mahino ki he vahe’i ki tu’a´ pea mo e makatu’unga ‘o ia´. Na’e ta’ofi ia ‘e he ‘ofisa security ‘o e Fale Faka-Pule’anga St. George ke hū ki loto. Na’e ‘ikai lava ha fakatalanoa ki he ‘Eiki Palemia´ makatu’unga ‘i he ‘ene tu’utu’uni ko eni ‘a’ana pē. ‘Okapau na’e fakafaingamalie’i ‘e he ‘Eiki Palemia´ ha taimi ke fakahoko ai ha talanoa femahino’aki ki he kaveinga ni, ‘e ‘ikai a’u ki he tu’unga ‘o e kumi ‘e he Faka’iloa´ ‘a ‘ene totonu ke tau’ataina´ ki he malumalu ‘o e Konisitūtone´.
