‘Oku hā tahataha mai ‘a e ngaahi feitu’u na’e ‘alu ki ai ‘a e Pa’anga Vāhenga Malōlō e Kakai Ngāue Faka-Pule’anga´, ‘a ē ‘oku makatu’unga ai ‘a e ‘ikai lava ke ma’u kakato e vāhenga malōlō ‘oku fehanu’aki ai ‘akinautolu kuo penisoni mei he ngāue´.
Na’e toki fakahū ki he Fale Alea 2026 ‘a e lipooti fakata’u ki he ta’u fakapa’anga 2024 ‘o ‘ilo ai na’e fakalea ko e nō, ki he kau faiongoongo´, ‘a e Kautaha Vakapuna Lulutai pea mo e Kautaha Pangike Langa Fakalakalaka ‘a Tonga mei he pa’anga vāhenga malōlō ‘a e kakai ngaue Faka-Pule’anga´. Ka ‘i hono ‘ilo hake, ‘oku ‘ikai ko ha nō ka ko e fakatau ‘inasi (shares) ‘a e Pule’anga ‘o e 2024 ‘i he ongo kautaha ko eni´.
Na’e ‘ilo heni ko e $11 miliona ‘a e mahu’inga fakakatoa ‘o e fakatau ‘inasi e Pule’anga 2024 ‘i he ongo kautaha ko eni´. Na’e fakahū atu ‘a e $11 miliona ko eni´ ‘i he 2023-2024. Talu mei ai ki he ‘aho ni ‘oku te’eki tu’o taha ha toe fakahū mai ha pa’anga mei he ongo kautaha ni ki he Poate ‘o e Pa’anga Vāhenga Malōlō.
‘Oku tānaki ki heni ‘a e fakatau ‘e he Poate Vāhenga Malōlō ‘a e Paradise International Hotel Pty Ltd ‘i Vava’u´, ‘o fe’unga mo e TOP$4,852,835.00.
‘Oku hā ‘i he lipooti fakata’u 2024 ‘a e pa’anga ‘oku fakafuofua ki he $18.7 miliona fakakātoa na’e fakahū atu ‘e he Pule’anga´ ki he ngaahi pisinisi fakataumu’a fakatupu pa’anga. Kā ‘i hono tānaki fakakātoa ‘o e pa’anga na’e fakahū ki he Kautaha Vakapuna Lulutai mo e Pangike Langa Fakalakalaka ‘o Tonga´, ‘oku fe’unga ia ki he $11.5 miliona. ‘Oku tētē ‘a e $7.2 miliona ‘o ‘ikai ma’u hano fakamatala fakapa’anga pē ‘oku ‘alu ia ki fē.
Fehu’i mei he Kakai:
- ‘Oku ‘i fē ‘a e $7.2 miliona? Na’e fakahū ki ha kautaha ‘a e Pule’anga´ pē kuo makona ha kato kehe ia ai?
- Ko hai ‘oku TALI-UI ki he $7.2 miliona? ‘E TALI-UI ki heni ha taha pē ‘oku fangota’i e pa’anga tukuhau´ ki he kato ava? Pea kapau ‘oku ava e kato´, ‘oku ava holo pe ki he ngaahi kautaha ‘a e Pule’anga pē ‘oku ava ia ki ha kato malu ta’etotonu?
- ‘E toe ‘osi e ‘ulungaanga laiki e kakava e kakai ‘o e fonua´, ‘e he kau ma’u mafai´?
