NUKU’ALOFA: ‘Oku ma’u ‘e he Letio ‘a e Kakai 88.1FM´ ha ngaahi fakamatala mahu’inga fekau’aki mo e tokotaha ‘i he Kapineti Lolotonga´ pea mo ‘ene ngaahi fakamole fakapa’anga kotoa.
‘Oku kamata lau ‘a e ngaahi fakamole ko eni´ mei he taimi na’e hū ai ki he Fale Alea ‘o Tonga´, ‘a ia ‘oku meimei ko e ta’u ‘e 15 eni mei ai, pe ofi ki ai.
Ko e ngaahi fakamatala pa’anga eni ‘oku kau ki ai ‘ene fefolau’aki fakalotofonua mo e folau ki tu’apule’anga, ‘a ia ko e ngaahi fakamole´ ko e totongi ‘o e tikite vakapuna, totongi nofo hotele, totongi kai mo e ki’i inuinu, totongi telefoni, totongi TA rate kehekehe ‘o makatu’unga ia ‘i he pule’anga muli ‘oku folau ki ai he ‘oku rate kehekehe pe ‘a e fonua takitaha, totongi loading 40% ‘oku tanaki atu ki he ‘ene folau´, pea mo e ngaahi folau ‘oku kau atu ki ai ‘a hono hoa´ pe ko e kau ngaue´, pea mo e ngaahi monu’ia kehekehe ‘oku ne ma’u ‘i he taimi ‘oku folau ai, ‘i hono lakanga ‘i he Fale Alea ‘o Tonga´ pea pehē ki hono lakanga ‘i he Kapineti ‘o ‘Ene ‘Afio´.
‘Oku kau ki he ngaahi ‘uhinga ‘o e fefolau’aki ko eni´, ‘a ‘ene toutou lava atu ko e mamata sipoti.
Ko e fakamatala ‘oku ‘omai´, ‘oku tanaki kotoa e fakamole fakapa’anga folau ko eni, ‘oku ‘i he pa’anga ‘e $3 – $5 miliona tupu kuo ‘osi fakamoleki mei he pa’anga totongi tukuhau ‘a e kakai ‘o e fonua´.
Ko e fehu’i eni ki he ‘Eiki Palemia, Lord Fakafanua pea mo Kapineti Lolotonga:
- Ko e mo’oni ‘a e fakamatala kuo a’utaki mai ki he Letio ‘a e kakai 88.1FM, ‘a eni ‘oku hā atu ‘i ‘olunga?
‘Oku ‘i ai ‘a e totonu fakakonisitutone e kakai ‘o e fonua ke nau ‘ilo ki ai pea mo e founga hono fakamoleki ‘enau pa’anga totongi tukuhau´. ‘Oku ‘i ai foki mo e totonu ho tau kakai Tonga nofo ‘i he ngaahi fonua muli´ ke nau ‘ilo ki ai he ‘oku nau talafi mai ‘a e $580 miliona ‘i he ta’u ki Tonga ni.
‘Oku ‘ikai ‘oatu ‘a e hingoa ‘o e tokotaha ni ‘i he ‘aho ni. ‘Oku tuku atu ‘a e faingamalie ke tali mai ai ‘a e fehu’i ko eni. ‘Okapau ‘e ‘ikai tali mai ‘a e fehu’i ni, ‘e tuku fakahangatonu atu ‘a hono hingoa´ ke ‘omai ha’ane tali ki ai.
