Nuku’alofa, Tonga — ‘Oku toe fakaakeake ‘a e sipoti Flag Football ‘i Tonga, ‘i he ngāue fakataha ‘a e U.S. Embassy Tonga, Tonga Ministry of Internal Affairs pea moe Tonga Flag Football Federation.
Na’e kamata ke fakafe‘iloaki mo fakalakalaka ‘a e Flag Football ‘i Tonga ‘i he vaha‘a ‘o e 2014 mo e 2016. I he fengaue’aki koeni moe U.S. Embassy, e malava ke hoko ‘a e sipoti ni koha matapa ma’ae hako tupu ‘o e fonua kenau fakafofonga’i ‘a Tonga i ha ngaahi feauhi ‘i muli. ‘Oku ‘amanaki foki ke hoko ‘a e Sipoti ni ko ha sipoti e lava ke hoko ko ha ma’uanga mo’ui etau fanau, tatau pe fanau fefine fakataha moe fanau tangata.
Na’e fakamatala ‘a Chargé d’Affaires ‘o e U.S. Embassy Tonga, Dr. Devon Brown, ‘oku mahu‘inga ‘aupito ‘a hono fakatupulaki ‘o e Flag Football, he ‘e kau ‘a e sipoti ni ‘i he Los Angeles 2028 Olympic Games, fakataha mo e Rugby Sevens.
Ko e Flag Football ‘oku tatau ‘a hono ngaahi tefito‘i taumu‘a mo e American Football, ka ‘oku ‘ikai ke fai ‘a e tau tui (tackle). Koe Flag Football, oku tui ‘e he kau va‘inga ha ngaahi fuka lipine ‘i honau kongaloto, pea ko e taumu‘a ‘a e kau malu‘i ke to‘o ‘a e fuka lipine ‘o e tokotaha ‘oku ne ‘ave ‘a e fo‘i pulu. Ko e sipoti ni foki oku ikai ke fu’u mahuinga ‘a e tau tui o hange koe ‘akapulu ka koe va’inga ‘eni kete ve’e vave mo mohu founga.
Koe sipot ni foki ‘oku ku ne ‘oange ha founga fo‘ou mo malu ange ki he tamaiki mo e to‘utupu ke nau hao meihe ngaahi lavea ‘oku fa’a hoko i he va’inga ‘akapulu.
Ko e sipoti ni foki oku tataki ai ‘a e BYU Head Coach Kalani Sitake, fakataha mo e kau faiako moe timi kehekehe e 10, o kau ai a e Mo‘ui Manatu ki ho Tupu‘anga (MMT), Ha‘akame Broncos, mo e ngaahi timi kehekehe mei he Vahenga Hahake.
‘I he teuteu ‘a Tonga ki he LA Olympics 2028, ‘oku lava ke hoko ‘a e ngāue mei he ngaahi komiuniti ko ha makatu‘unga mahu‘inga ki hono fakatupulaki ‘a e sipoti ni ke manakoa kihe to’utupu ‘o e fonua koeuhi ke nau fakafofongai ‘a Tonga ki muli ‘i he kaha’u.
