Uasingatoni, ‘Amelika: Na’e kamata ‘i he pongipongi Pulelulu 29 Siulai 2026 ‘a e hopo Senate Homeland Security Committee pea ‘oku fakafuofua hono loloa ki he houa ‘e 3.
Ko e hopo eni fekau’aki mo Dr. Anthony Fauci, ta’u 85, ko e talekita malōlō e National Institute of Allergy and Infectious Disease (NIAID), ‘a ia kuo tukuaki’i ki ai e ngaahi makatu’unga tefito lalahi ‘e 3:
1. Fakapa’anga ‘o e Leepi Wuhan pea mo e Tupu’anga ‘o e Koviti-19
Fakapa’anga e Fakatotolo Fakasaienisi ‘Gain-of-Function’ : ‘Oku pehē ‘ehe kau fakaanga´ na’e fakapa’anga ‘e he National Institute of Allergy and Infectious Disease (NIAD) ha ngaahi fakatotolo fakasaienisi fakatu’utamaki ki hono pule’i mo liliu e vailasi´ ‘i he Wuhan Institute of Virology.
- Fufūu’i e Tupu’anga (‘o e vailasi koviti-19): Tukuakiʻi ʻe he kau faʻu lao´ ki hono teke ʻa e fakakaukau ʻo e “kolosi fakanatula” (natural spillover) ke fakapuliki ʻa e fehokotaki fakapaʻanga ʻa ʻene kautaha´ mo e leepi fakatotolo Siaina´ ʻa ia ʻoku nau mahaloʻi ki ai e mama mei ai ki tu’a ʻa e vailasi´.
2. Taki Hala’i ‘o e Fale Alea´ pea mo e Kakai´
- Loi ‘i he Fuakava: ʻOku tukuakiʻi ia ki hono fakahoko ʻo e fuakava loi ʻi he ngaahi fakamoʻoni ʻi he kuohili´ ʻaki hono fakaʻikaiʻi e paʻanga ʻa e puleʻanga´ naʻe ʻalu ki he fakatotolo ʻi Wuhan.
- Ngaue Fehangahangai mo e Tu’utu’uni Ngaue ki he Penitemiki: ʻOku tuhu ʻa e kau fakafepaki´ ki heʻene ngaahi tohinoa fakatautaha´, ‘a ia ‘oku hā ai naʻe tuʻutuʻuni ke fokotuʻutuʻu fakapulipuli ʻa e fakataputapui´ mo e tapuni ʻo e ngaahi ʻapiako´ lolotonga ia naʻa ne fakafotunga mai ki tu’a ʻo hange naʻe siʻisiʻi ʻene kaunga ki ai´.
- Fakaʻauha ʻo e ngaahi lekooti´: Kuo tukuakiʻi ʻe Senatoa Rand Paul ʻa Fauci ki hono fakaʻauha ʻo e ngaahi lekooti ʻa e puleʻanga´ ke hao mei hono fakatotolo’i´.
3. Kumi Tu’umalie Fakafo’ituitui
a. Ngaohi Kovia ‘o e Kau Ngaue´ ke ma’u e Pale Fakapa’anga: Tukuaki’i ‘e Senator Josh Hawley ‘a Dr. Fauci ki hono ngaue’aki e kau ngāue fakapule’anga´ ko e “misini fakahū tohi kole, ngaue taimi kakato” ki he tulifua ki he ngaahi pale pa’anga fakafo’ituitui, hange ko e 2021 Dan David Award, ‘a ia na’e laka hono mahu’inga ‘i he $1 miliona.
‘Oku faka’ikai’i hokohoko ‘e Dr. Fauci na’e ‘ikai ke ne fakahoko ha ngaue hala pea ‘oku ne fakahā na’e fakatatau ‘ene ngaue ki he ngaahi fakamatala fakasaienisi ‘o e taimi ko ia´ pea ne taukave’i ko e ngaahi faka’eke’eke Fakafale Alea ko eni´ ko ha feinga fakapolitikale ta’etotonu ia ke tuku popula ai ia.
‘Oku tuku’au mai ‘a e keisi ko eni mei he ngaahi me’a kehekehe ‘i he kuohili´ fekau’aki mo e Koviti-19 kā ko e fakalalahi ‘o a’u ki he tu’unga hopo ‘i he lolotonga ni´, na’e makatu’unga ia ‘i he tohi-noa fakafo’ituitui (dairy) ‘a Dr. Fauci na’e ma’u ‘e he fakafofonga Fale Alea, Senator Rand Paul, ‘a ia ‘oku ne toe sea ‘i he United States Senate Committee on Homeland Security and Governmental Affairs. Ko e tohi-noa ko eni´ ‘oku peesi 1,141 pea na’e lekooti ia ‘e Dr. Fauci ‘i he tanaki’anga fakamatala ‘a e pule’anga´. Koe’uhi ko ‘ene hiki ‘ene tohi-noa ‘i he tanaki’anga fakamatala ‘a e pule’anga´, na’e mo’ulaloa ai ‘ene ngaahi tohi-noa´ ki hono ma’u ‘e he pule’anga pea ‘ikai ke ‘i ai ha malu’i kakato ‘o e totonu fakafo’ituitui.
Ko e tohi-noa eni ‘a e toketa´ mei he konga ki mui ‘o e 2019 ki Tisema 2022 pea hā ‘i ai e ngaahi feto’aki lahi ‘i he ‘ene ngaahi fakamatala ki he kakai´ mo ‘ene ngaahi veiveiua fakataautaha fekau’aki mo e tupu’anga ‘o e Koviti-19, ngaahi fakataputapui mo ‘ene ‘iloa fakamamani lahi fakatu’upake. ‘Oku ha ‘i he ‘ene tohi-noa ‘a e ngaahi me’a ni:
1. Tupu’anga ‘o e Koviti-19 mo ‘Ene Ngaahi Veiveiua ‘i he “mama ki tu’a e leepi”
a. Maketi kakano’i manu Wuhan : ‘I he ‘aho 26 Sanuali 2026, na’e hiki ‘e Dr. Fauci ‘i he ‘ene tohi-noa´ fekau’aki mo e Maketi kakano’i manu Wuhan, ‘o pehē ‘oku ‘ikai ko e feitu’u ia ne tupu mei ai e vailasi´, kā ko e feitu’u ia na’e fakalalahi ai, neongo ‘a e ngaahi tālanga kimu’a ‘o nofo taha ‘i he Maketi kakano’i manu Wuhan.
b. Fakakaukau’i e mama ki tu’a mei he leepi: ‘Oku hā ‘i he ‘ene tohi-noa´ ‘a ‘ene fakatokanga’i ‘a e malava ko ha fehalaaki ‘a e leepi´, ‘o ne pehe ai ‘oku ne “meimei fakapapau’i na’e tupu fakanatula ‘a e vailasi” ka ‘oku ne “fakakaukua ‘a e malava ko ha mama eni mei he leepi´”.
c. Fakafisinga’i e Fakamahamahalo: Na’e hiki faka’auliliki ‘e Dr. Fauci ‘ene ta’efiemalie ki he “ngaahi fakakaukau fa’ufa’u´”, hangē ko e ngaahi tukuaki’i na’a ne fakataha fakapulipuli mo e CIA ke fakalongo’i ‘a e fakakaukau fa’ufa’u ko e “mama ki tu’a mei he leepi”.
2. Puipuitu’a ‘o e Ngaahi Tu’utu’uni Fakataputapu
a. Tapuni ‘o e ngaahi ‘Apiako: ‘Oku hā ‘i he ‘ene ngaahi tohi-noa´ na’e fale’i ‘e Dr. Fauci ‘a e ‘ofisa kolo pe Mayor ‘o New York, Bill de Blasio, ke tapuni ‘a e ngaahi ‘apiako, ngaahi pā, ngaahi falekai´ ‘i Ma’asi 2020. ‘Oku fehangahangai eni mo ‘ene fakamatala ki he kakai ‘o pehe “na’e ‘ikai ha’ane kaunga” ki he tapuni ‘o e ngaahi ‘apiako.
b. Fepaki mo Trump: ʻOku fakamatalaʻi ʻi he tohi-noa ʻa e vā fetuʻutaki mo Palesiteni Donald Trump, ʻa ia naʻe pehe ʻe Fauci ʻoku “ʻikai lava ke fakaleleiʻi” lolotonga ha fakataha ʻi Maʻasi 2020 fekauʻaki mo hono fakaloloa ʻo e tāpuni´ mo e fakataputapui fakafonua´.
3. ‘Iloa / Ongoongoa mo e mafatukituki ‘o e Ngaue Fakataki
a. ‘Iloa / Ongoongoa Fakafokifa: ‘I Me 2020, na’e tohitohi noa ai ‘a Dr. Fauci fekau’aki mo ‘ene ongoongoa “fakafokifa pea matu’aki ta’e’amanekina” hono ‘ilo’i fakamamani lahi ‘o ia´, pea ne pehē ai ‘oku ‘ikai ko ha faka’afa’afa ke ne pehē, ko ia ko e tokotaha “’iloa taha ia mo talanoa’i lahitaha ‘i he fonua´”.
b. Ngaahi Fakamanamana: Na’a ne fa’a tohitohi fekau’aki mo e tafa’aki fakatu’utamaki ‘o ‘ene ongoongoa´, ‘o ne pehē ai ko e mahiki hake ko eni ‘a ‘ene ongoongoa´, ‘oku ne fakatupunga ai ha ‘aukolo lahi kiate ia ‘a e ngaahi “meili taufehi’a mo e ngaahi fakamanamana fakapoongi lahi ‘aupito” ‘a ia ‘oku fakahangatonu mai ki hono famili´.
‘I he kotoa ‘o e ngaahi faka’eke ‘i he hopo ni, na’e tali kotoa ‘e Dr. Fauci ki ai ‘aki ‘a e 5th Amendment, ‘a ia ko e totonu fakakonisitutone ia ‘a ‘Amelika ‘oku ne faka’atā e toketa´ ke ne ta’etali ha fakafehu’i kiate ia. ‘I he faka’osinga ‘o e hopo ko eni´, na’e ‘ikai ha toe ‘ilo fakasaienisi fo’ou pe ko ha toe fakamaama makehe fekau’aki mo e penitemiki Koviti-19´. Pea koe’uhi ko e ‘ikai tali ‘e Dr. Fauci ‘a e ngaahi fakafehu’i´, ‘oku pehe ai ‘e he Sea, Senator Rand Paul, ‘oku faka’aho ki he uike ni ke fakahoko ai e vouti ‘a hono tukuaki’i faka’ofisiale ‘a Dr. Fauci ki he ta’efaka’apa’apa’i ‘o e Fale Alea´. ‘Oku pehē ‘e Senator Rand Paul, ‘oku toe ‘i ai mo e fehu’i fakalao ‘e taha ‘oku totonu ke vakai ki ai ‘a e fakamaau’anga´ pe ‘oku kei totonu ke ngaue’aki ‘a e 5th Amendment ‘i he funga ‘o hono lolotonga ma’u ‘a e tala’ofa fakapalesiteni ‘a ia ‘oku ne faka’atā kakato ai ha taha mei ha fa’ahinga tukuaki’i hia.
