‘I he ‘aho 29 Sune 2026, na’e mālōlō ai e Tokoni Palemia ‘a Ha’amoa´ mei hono lakanga´ hili ia e tu’u ‘a e Fakamaau’anga Tangi´ ‘i he talatu’utu’uni ‘a e Fakamaau’anga Lahi´ ki he ‘ene keisi maumau’i ‘o e ngaahi lao ki he fili Fale Alea´ ‘i he ‘ene foaki ha totongi fūfū ko e $150.00 ki ha tokotaha fili.
‘I ha founga tatau pē ‘i Tonga ni, kuo fakahalaia’i ai ha kau mēmpa falealea ‘e toko tolu ki he hia tatau pē – ko e foaki totongi fufū lolotonga ‘a e vaha’ataimi tapui ‘e tolu māhina ‘o e fili Fale Alea´. Kuo fakahū ‘e Lata’ifaingata’a Tangimana (Niua 17) – Minisitā Pa’anga mālōlō, Semisi Sika (Tt2)- Minisitā Takimamata mo e Ngaahi Ngāue Lalahi mālōlō, pea mo Taniela Fusimalohi (‘Eua 11) – Minisitā Fonua mālōlō, ‘a ‘enau tangi ki he Fakamaau’anga Tangi´. Kuo fokotu’u ‘e he Fakamaau’anga Tangi´ ‘a e taimi ke fanongo ai ki he ngaahi tangi ko ‘eni´ ‘o kamata mei he ‘aho 7 ‘o Siulai ki he ‘aho 10 ‘o Siulai 2026. ‘Oku kau ‘i he ngaahi fakamaau ko ‘eni ‘a e keisi ‘a Tukunga vs Toumo’ua (Tt 9) mo e Lavulavu vs Latu (Vv 16). ‘E kamata ‘a e ngaahi fakamaau ko ‘eni ‘aki ‘a Tangimana vs Finau ‘i he Tūsite ‘aho 7 ‘o Siulai, hoko atu kia Tukunga vs Toumo’ua ‘i he Pulelulu ‘aho 8, Sika vs Fasi ‘i he Tu’apulelulu ‘aho 9, pea mo e Lavulavu vs Latu / Lavemaau vs Fusimalohi ‘i he Falaite ‘aho 10.
‘Oku ‘i ai ‘a e fakatauange ‘oka hili e ngaahi fakatonutonu fakalao ko eni´, ‘e ma’u ‘e he pule’anga ‘o Lord Fakafanua ha tu’unga ‘oku toe ma’uma’uluta ange ki he fakahoko ‘o e fatongia´.
