‘Oku lolotonga lele ‘a e fekihiaki ‘i he Fakamaau’anga´ ‘i he vaha’a ‘o ha Kautaha Security pea mo e Pangike Langa Fakalakalaka ‘o Tonga´. Na’e ‘i ai ‘a e aleapau ngaue ‘a e Kautaha Security Guard ko eni´ pea mo e Pangike Langa Fakalakalaka ‘o Tonga´ ki he ngaue le’o ki he Pangike´ pea kau ki ai mo hono le’ohi ‘o e tokotaha loea na’e haea mai ‘e he Pangike ke fakahoko ha ngaue fakalao ma’a nautolu.
Ko e ngaue ko eni´, kuo ‘osi totongi ‘e he Pangike ‘a e $8 Kilu ki he Kautaha Security Guard pea ‘oku toe ‘eke ‘e he Kautaha Security Guard ha toe $6 Kilu tupu kehe ki he ‘enau le’ohi ‘a e Loea´ houa ‘e 24 ‘i he ngaahi ‘aho ‘e ni’ihi ‘o kau ki ai mo hono le’ohi mo hono loki mohe´ lolotonga ‘ene mohe ‘i he po’uli´ ‘i he taha ‘o e ngaahi loki ‘i he Hotele Tano’a ‘i loto Nuku’alofa´.
‘Oku kau ki he ‘eke ko eni´ ‘a e totongi me’alele Rental na’e rent $500 ki he ‘aho. Na’e toki ‘ilo ko e me’alele eni na’e rent ke ngaue’aki ‘e he Loea ko eni´. Ko e me’alele eni na’e ‘ikai haea mai mei ha kautaha rental angamaheni ‘i Tonga ni. Ko e anga maheni ‘o e me’alele rent ‘i Tonga ni ‘oku kamata ‘i he $50 ki he ‘aho pea ko e mamafa taha ko e $250 ki he ‘aho, ko ha me’alele ia ‘oku lahi pea toe ‘i he tu’unga ‘oku kei fo’ou ‘aupito. Ko e me’alele rent mamafa taha eni ‘i he hisitolia ‘o e pisinisi me’alele rent ‘i Tonga ni´. Ko e me’alele eni na’e haea mai ‘e he Loea´ pē pea mei hono famili ofi ‘aupito. Ko e tokotaha ‘a’ana ‘o e me’alele na’e rent, ko e tokotaha ia ‘oku ne ‘a’ana ‘a e Kautaha Security Guard tatau pe na’e ngaue’aki ‘e he Pangike Fakalakalaka ‘o Tonga ke le’ohi ‘o e Loea ko eni´.
Ko e toe me’a ne toe ngali kehe i he me’a ni, ko e Loea pe ia ‘a e Pangike Langa Fakalakalaka ‘a Tonga na’a ne fa’u e aleapau ngaue a e Kautaha Security ko eni pea mo e Pangike Fakalakalaka ‘a Tonga ‘i he kuo hili´.
‘I he taimi tatau ko e fakatonutonu fakalao ko eni aia ko e kautaha Security ko eni ko kinautolu na’a nau faka’ilo e Pangike fakalakalaka ‘o Tonga, ko e ikai ke totongi ange toenga moua ko e $6 Kilu tupu. Kae fakatokanga’i ange kuo osi totongi kakato ange ehe Pangke Langa Fakalakalaka ‘o Tonga ‘a e pa’anga e $8 Kilu tupu meimei pa’anga e miliona ki he Kautaha Security Guard ko eni´.
‘Oku pehē na’e ‘osi fakahoko e tu’utu’uni ‘a e Tu’i Fakamaau Lahi ‘a Tonga ki he Pangike Langa Fakalakalaka ‘o Tonga ke totongi ‘a e $3 Kilu tupu ki he Kautaha Security Guard. Ka kuo toe fakahū atu ‘e he Loea´ ki he Pangike ke ‘set aside’ ‘a e tu’utu’uni ko eni´ pea ‘oatu mo ‘ene ‘uhinga fakalao ki ai.
‘Oku toutou ui e hopo ko eni i he Fakamaauanga Lahi´ ke hoko atu kā ‘oku ‘ikai ke lava e Talatalaaki´ pe ko e Kautaha Security Guard ‘o ha’u ki he hopo´ mei Nu’u Sila. ‘Oku ‘omai ‘ene tohi mei he toketa ‘oku ‘ikai lava ‘o hā ‘i he Fakamaau’anga Lahi´ he ‘oku puke lahi mo mahamahaki. ‘Oku ‘alu ‘a e hopo ko eni pea hange ‘oku ‘ikai ke toe fie ha’u e pule ‘o e Kautaha Security Guard ke fakakakato ‘ene faka’ilo ko eni ‘o e Pangike Langa Fakalakalaka ‘o Tonga´.
Lolotonga ko eni, kuo ‘osi tuku ki tu’a ‘e he Pangike Langa Fakalakalaka ‘o Tonga ‘a e Loea. ‘Oku toe faka’ilo ‘e he Loea ‘a e Pangike Langa Fakalakalaka ‘a Tonga´ pea ne toe puke kotoa e ngaahi faile mo e ngaahi lekooti ‘o e ngaahi keisi na’e ngaue ki ai´. Kuo ‘osi fakangaue’i ‘e he Pangike ha loea fo’ou ‘o fetongi ‘aki ‘a e Loea ko eni´.
Na’e ‘osi fakahoko ‘e he Pangike ‘a e totongi pa’anga lahi ‘aupito ki he Loea´, ‘i he hingoa pe ‘o e Loea´. Kā ‘oku toe faka’ilo ‘e he Loea ‘a e Pangike´ ki he ‘ene ngaahi toenga invoices na’e ‘osi tuku atu ki he Pangike´, ‘oku laka ‘a e mahu’inga ko eni ‘i he miliona pea ‘oku ‘oatu ‘a e ngaahi invoices ‘i he hingoa ‘o ‘ene kautaha lao, ‘a ia ‘oku fakatu’asila ‘aki ‘a e tu’asila fonua ‘i muli.
Na’e fakahoko ‘a e fekumi ki he tu’asila ‘o e kautaha lao ‘a e Loea ko eni´ ‘o ma’u ‘oku ‘ikai ha tu’asila pehe´ pea ‘oku ‘ikai ha ‘ofisi lao ‘i he tu’asila ‘oku hā ‘i he ‘ene laiseni loea´ mo ‘ene kautaha lao´.
‘Oku muimui’i ‘e he 88.1FM Letio ‘a e Kakai pea mo e Kalonikali Tonga ‘a e hopo ko eni´ pea ‘e toki tuku atu ‘a hono hokohoko mo hono ola ‘i he taimi ‘e ma’u ai.
