‘I he Press Conference, pē ko e fakataha ‘a e ‘Eiki Palemia´ pea moe ngaahi kautaha faiongoongo´ ‘i Siulai 2026, na’e fehu’i ai ‘e he faiongoongo ‘a e 88.1FM Letio ‘a e Kakai ki he ‘Eiki Palemia´ pē ko hai ‘ia kinautolu (mēmipa ‘o e Kapineti) na’e fakamo’oni loi ‘i he lesoa e lisi ‘a e NDRMO mei he Tonga Power Ltd. Na’e fakalea atu ‘a e faiongoongo e 88.1FM ‘oka hili ‘ene tali e fehu’i ‘uluaki ‘e toki ‘oatu e fehu’i hono 2. Na’e tali mai ‘e he ‘Eiki Palemia ke fakahoko ange ‘a e fehu’i hono 2.
Na’e hoko atu ‘a e fepotalanoa’aki kae ‘ikai tali mai ‘a e fehu’i ki he fakamo’oni ‘i he lesoa´. ‘I he faka’osinga ‘o e Press Conference, na’e me’a ai e ‘Eiki Palemia´ ‘o pehe, ko e lisi ‘o e Tonga Power na’e fakahoko ia ‘i he 2015 pea fakahoko ‘a e toe lisi ‘a e NDRMO ‘i he 2016. Ko e pule’anga lolotonga ‘oku nau ngaue ki ai ke kaniseli ‘a e toe lisi ‘a e NDRMO.
Kā ‘oku ‘i ai ‘a e fakamatala ko e pule’anga lolotonga na’e fakahoko ai ‘a e toe lisi ‘o e NDRMO.
‘I he tu’unga ko ia, ‘oku ‘i ai ‘a e ngaahi fehu’i mei he kakai ‘oku ‘oatu heni ki he ‘Eiki Palemia:
Ko hai ‘ia kimoutolu (Kapineti lolotonga) na’e fakamo’oni loi ki he Lesoa ‘o e toe lisi mei he Tonga Power ki he NDRMO?
Ko e hā e ‘aho, taimi, māhina mo e ta’u na’e na’e fakahoko ai ‘e ho’o pule’anga´ ‘a e ngāue ko eni ma’ae Lesoa´?
Ko e fiha ‘oku kei toe ke totongi ‘e he Tonga Power Ltd ki he Pangike ANZ, hili hono lesisita ‘o e deed mo hono fakalahi ‘aki e variation of mortgage Book 6, Folio 10610 C ke hiki hake ki he $58,145,678.53?
Na’e kaniseli fakakū ‘a e toe lisi ‘o e ‘eka ‘e 2 ‘oku tu’u ai e NDRMO?
Ko e hā e ‘uhinga ‘o hono kaniseli ‘o e toe lisi ‘a e NDRMO?
‘Okapau ‘oku mou tala na’e ‘ikai ha me’a ‘e hala pē ta’efakalao ‘i he toe lisi ki he NDRMO, ko e hā leva e ‘uhinga ‘o hono toe kaniseli ‘a e toe lisi NDRMO?
Ko hai e Minisita Fonua pē Minisita Fonua Le’ole’o na’a ne fakahū atu e pepa kapineti ko eni´ pea ko hai na’e fakamo’oni hingoa ki he pepa kapineti ko ia´?
Ko e pa’anga ‘e fiha na’e to’o mei he grants mei he World Bank na’e ‘omai ‘o pehe ko e me’a’ofa ke langa ‘aki e fale NDRMO, kae totongi $1.00 ‘i he ta’u ki he Lesoa? Pea ko hai na’e ‘ave ki ai e pa’anga ko ia?
‘I he ‘uluaki lisi ‘o e Tonga Power Ltd ‘i he 2016´, na’e kau ‘i he alea lisi ko ia´ te mou to’o ‘a e ‘eka ‘e 2 ‘o toe lisi atu ki he NDRMO?
Na’a mou ‘ilo fakaku ‘i he 2026 ne hala ho’o mou tafoki hake pē ‘o kaniseli e toe lisi ‘eka ‘e 2 ki he NDRMO?
Ko hai e Loea na’a ne fale’i kimoutolu ke mou fakamo’oni loi ‘i he Lesoa´?
Ko e fakamo’oni loi´ ko e hia mamafa ia ‘i he Pule’anga Tonga. ‘Oku ‘i ai ‘a e faka’amu ‘e lava ke tuku mai ha tali ki he ngaahi fehu’i ko eni.
