‘Oku uesia lahi ‘a e kau toulekeleka ‘i Tonga ni ‘i he taimi ni, koe’uhí ‘oku fakangatangata pē ‘a e taimi ‘oku nau lava ai ‘o ma’u ‘enau vahenga fakamahina ‘i he ‘aho 8 pe ki he ‘aho 15 ‘o e māhina kotoa pē. Na’e fetu’utaki ‘a e Letio ‘a e Kakai ki he ‘ofisi kā na’e ‘ikai ha tali ‘e ‘omai ki ai.
Ko e launga eni ne ‘omai mei he kakai´ ki he Letio ‘a e Kakai´ ‘o felave’i mo e ‘ikai toe lava ma’u ‘enau vahenga ‘i ha toe ‘aho kehe ange mei he ‘aho 8 ki he 15 ‘o e mahina kotoa. ‘Oku nau fehu’ia e ‘uhinga ‘oku ‘ikai malava ai ke ma’u ‘enau vahe fakamahina ‘i ha toe ‘aho makehe ange mei heni pea ke nau tau’ataina ki he ‘aho ‘oku nau toki faingamalie ai ke nau lava atu ai ‘o toho ‘enau seniti ko eni.
‘I he anga e vakai ‘a e kau toulekeleka, ‘oku nau tukuaki’i e lahi ‘o e folau ki tu’apule’anga ‘a e kau ngaue Faka-Pule’anga´ mo e kau Minisita´ kae ‘ikai ke nau nofo ‘o fakahoko ‘enau ngaue´. ‘Oku ‘iai ‘enau tokanga ki he si’i e mahu’inga ‘o ‘enau vahenga ‘o fakatatau ki he hikihiki e mahu’inga fakapa’anga ‘o e koloa´ mo e anga e faingata’a ange e mo’ui ‘i he lolotonga ni´. Pea ko ‘enau faka’amu´ ia pe ‘e lava fakasi’isi’i e folau noa ki muli ‘a e kau Minisita´ kae tuku mai ha pa’anga ke hiki hake ‘aki ‘enau vahenga.
Ko e fehu’i mei he kau toulekeleka ki he Pule’anga: ‘oku malava ke toe vakai’i hano toe fakalelei’i e ‘aho 8 ki he 15 ‘o e mahina kotoa pe?
