Nuku’alofa 19 Sepitema – ‘Oku fehu’ia ‘e he ‘Atita Seniale´ ‘a e $2 miliona tupu ‘oku tukuaki’i ai e Minisita Ako Malōlōo mo e Potungaue Ako´ ‘i he ta’u 2022-2024. Ko e fakamoleki eni ‘o e pa’anga laumiliona tupu ‘o e pa’anga tukuhau kā ‘oku ‘ikai ma’u ha vausia pē ha ngaahi lekooti fakapepa ‘o e founga mo e feitu’u na’e ‘alu ki ai´.
‘Oku tanaki eni ki he hoha’a e kakai totongi tukuhau ‘o e fonua´ ki he founga ‘o e mole e lau miliona ‘ikai ha ngaue fakapepa ke tali-ui ki ai e fa’ahinga fua fatongia ko eni. ‘I he taimi na’e ‘eke ai ke ‘omai ‘a e ngaahi vausia mo e tali totongi ‘o e ngaahi fakamole ko eni´, ‘oku ‘oatu ‘a e tali ‘o pehe ‘oku ‘ikai ma’u, kuo ‘osi mole ia.
Ko e fotunga eni ‘o e fua fatongia ‘oku ta’efe’unga ‘aupito ke kei kātekina ke hokohoko atu pea ‘oku ‘i ai ‘a e ngaue lahi ‘aupito ‘a e Komisiona Polisi´ mo e Potungaue Polisi´ ke fakatotolo’i pea ki he ‘Ateni Seniale ke faka’ilo kae lava fakangata hono fakaehaua’i e pa’anga tukuhau e kakai ‘o e fonua´.
