NUKU’ALOFA 19 SEPITEMA – Na’e fakahā faka’ofisiale ‘e he PSC ‘i he ‘aho 18 Sepitema, ‘a hono fakanofo ‘o Dr. Vinolia Fifita Salesi ko e ‘Ofisa Pule Ngaue (CEO) ia ‘o e Potungaue ki he Ngaahi Ngaue Lalahi. Ko hono fili eni ‘o Dr. Salesi ko e fetongi ‘o Lopeti Heimuli, kuo ne pekia.
Ko Dr. Salesi ‘oku ne ma’u mata’i tohi Bachelor in Aviation Management mei he ‘Univesiti Massey ‘i he 2005, Master of Aviation Management mei he ‘Univesiti Griffith ‘I he 2010 pea pehe ki he ‘ene mata’itohi PhD, ‘Univesiti Massey 2017. ‘Oku fakafuofua ki he ta’u ‘e 16 ‘a e fakahoko fatongia ‘a e tokotaha ni ‘i he Potungaue ki he Ngaahi Ngaue Lalahi.
‘Oku fakamālō atu ‘a e 88.1FM mo e Kalonikali Tonga´ kiate koe Dr. Salesi ‘i he ngaahi ngāue kotoa pē kuo ke fakahoko ma’ae fonua´ ‘i he kuohili´, pea ‘i ho’o hokosia ki he lakanga fakataki ni, ‘oku mau fakamonu atu ke kau ‘a Langi ‘i he fua ‘o e ngaahi fatongia kotoa pe ‘oku teuaki atu ki ai ‘a ho’o fononga´.
