‘Ikai tauhi ‘a e ‘Eiki Palemia Lolotonga´, Lord Fakafanua, ki he ‘ene palomesi ki he ‘Ene ‘Afio´, Fale Alea´ moe Kakai ‘o e Fonua´.
‘I he ‘aho Mōnite 15 Tisema 2025, na’e me’a ai ‘a Lord Fakafanua ‘i he ‘ene fakamalanga kemipeini ki he lakanga ‘Eiki Palemia ‘o Tonga´, ‘o ne pehe´:
“’O a’u ki ha kuonga ‘i he ta’u ‘e 15 ko eni kuo ‘osi´, ‘OKU AFE’I PE LAO´ KE FAKAHAOFI E KAU TAKI ´. Anga fēfē? Ke fili mai e hou’eiki nōpele´ pea mo e kakai e fonua´ ki he fale ni pea nau hanga pe ‘o paasi e ngaahi lao, KO E KI’I PEHE’I PĒ KONISITŪTONE´ KE FAKAHAOFI AI KINAUTOLU. Sea ko ha fononga ia ‘oku fiema’u ke tau hoko atu ki ai? …. HALA IA SEA”
‘I he lolotonga ni, ‘oku ‘i Fale Alea ‘a e Lao Fakaangaanga fo’ou Public Funds Management fika 6 ‘o e 2026. Ko e lao eni ‘oku ne liliu kakato ‘a e lao ‘o Fale Pa’anga´ pea ‘oku ngali ‘oku taumu’a eni ke fakahaofi ‘aki kinautolu e Pule’anga ‘o e kuohili´ fakataha mo e Pule’anga lolotonga´ mei he ngaahi lao ‘o e pa’anga´ mo e fefakatau’aki Faka-Pule’anga´ na’a nau maumau’i.
Ko e Lao Fakaangaanga ko eni´ ‘oku lolotonga ‘i he Komiti Lao ‘a e Fale Alea´. Na’e te’eki ‘omai ki he kakai ‘o e fonua´ ke nau vakai ki ai mo ‘oatu ha’anau fakakaukau kimu’a pea toki fakahū ki Fale Alea, kā na’e fakahū hangatonu pē mei he Kapineti´ ki Fale Alea´.
‘I he ngaahi uike kimu’a pea fakahū ki he Fale Alea´ ‘a e Lao Fakaangaanga ko eni ki hono Pule’i ‘e he Pule’anga ‘a e pa’anga ‘o e Fonua´, na’e toutou talanga’i ‘i Fale Alea ‘a e ngaahi me’a na’e ma’u ‘e he ‘Atita Seniale´ ‘o fekau’aki mo e pa’anga ‘e lau miliona na’e fakamoleki kae ‘ikia ‘i ai ha fakamatala pa’anga ki ai – vausia mo e tali totongi. Hili ange ‘a e ngaahi talanga’i ko eni ‘o e lipooti ‘a e ‘Atita Seniale´, kuo fakahū atu ‘a e Lao Fakaangaanga ko eni´, kā ‘oku te’eki maau hano fakamahino mai pē ‘e fakahoko ha ngāue Tali-Ui ki he pa’anga ‘oku tokanga ki ai ‘a e ‘Atita Seniale´ ‘oku kei pulia´.
Na’e kau ‘i he fakamalaanga kemipeini ‘a Lord Fakfanua ki he lakanga ‘Eiki Palemia ‘o Tonga ‘a ‘ene me’a ‘o pehe:
“… ‘OKU FIEMA’U E LEA´ KE TATAU MO E ACTION!”
Fehu’i mei he Kakai ‘o e Fonua:
- ‘Eiki Palemia, ‘oku ke tui malohi ‘OKU TATAU HO’O LEA´ PEA MO HO’O ACTION?
- ‘E toe fakafoki mai e lao fakaangaanga ko eni ke vakai ki ai e Kakai ‘o e Fonua´?
- Ko e ha ‘a e fiema’u ‘a e Pule’anga Tonga ‘i he lolotonga ni, ‘oku mahu’inga ai ke fetongi pe liliu ‘a e Lao lolotonga ki he Pa’anga´?
