‘I he ‘aho 23 Sepitema 2026 – Na’e tali ‘e he Fakamaau Justice Timothy Kelly ‘o e District Court ‘a e faka’ilo mo e kole tokoni fakavavevave ki ha Tu’utu’uni Fakataimi ‘a e fakamaau’anga´ ki hono ta’ofi mo ‘ikai tali ‘e he Palesiteni ‘o ‘Amelika – Donald Trump, ‘a e ngaahi Kautaha Ongoongo lalahi ‘e tolu ke nau hū ange ‘o kau ki he ‘ene fakataha mo e kau faiongoongo´ ‘i he White House pea mo hono toe to’o ‘enau paasi hū ki loto´.
‘I he ‘aho 18 ‘o Sepitema 2026 na’e tu’utu’uni ai ‘a Palesiteni Trump ke ta’ofi pea ‘ikai ngofua ki he CNN, MS Now mo e Politico ke kau ange ki he ‘ene fakataha mo e kau faiongoongo´ ‘i he White House. Na’e makatu’unga eni ‘i he ‘ene tukuaki’i ko e kau faiongoongo ko eni´ ‘oku nau loi mo mimio ‘a e ongoongo´ pea ‘oku nau tukuatu ‘a e ngaahi ongoongo “fake news” ki he kakai´ pea ‘oku ‘ikai ke ne toe tali ke kau ange ki he ‘ene ngaahi fakataha mo e kau faiongoongo´.
‘I he ‘aho 21 Sepitema 2026, na’e faile ai ‘e he ngaahi Kautaha Faiongoongo ‘e tolu ko eni´ ha faka’ilo ‘o Palesiteni Trump fe’unga mo e peesi ‘e 27, ko e taukave’i ‘oku hala e tu’utu’uni ‘a Palesiteni Trump ‘o fakatatau ki he First Amendment ‘o ‘enau Konisitūtone´. ‘Oku tukuaki’i heni ‘a Palesiteni Trump ki he ngāue filifilimanako pea mo e ‘ikai fou ‘i he fa’unga ngaue totonu Faka-Konisitutone´ (Due Process) ‘i he ‘ikai ‘oange ha fakatokanga kae ‘oange ‘a ‘ene tu’utu’uni fakafokifā.
‘I he ‘aho 22 Sepitema 2026, na’e tuku mai ai ‘e he Fakafofonga Faka-Pule’anga ‘a Palesiteni Trump ‘enau tali ki he tohi faka’ilo mo e kole Faka-Fakamaau’anga ko eni´. ‘Oku fakafepaki’i lahi ‘e he Justice Department ‘a e kole ta’ofi fakataimi fakavavevave ko eni ‘a e ngaahi Kautaha Faiongoongo ‘e tolu ko eni´.
‘I he ‘aho 23 ‘o Sepitema 2026, na’e fanongoa ai ‘e he fakamaau’anga´ ‘a e ongo fa’ahi pea ‘aofangatuku e ‘Eiki Fakamaau´ Timothy Kelly ‘oku ne tali ‘e ia e kole mei he tafa’aki ‘o e Kau Faiongoongo´ pea ‘oange ‘a e Tu’utu’uni Fakataimi ke faka’atā kinautolu ki he ngaahi fakataha ‘a Palesiteni Trump mo e kau faiongoongo ‘i he White House pea fakafoki ange mo ‘enau paasi hū ki loto ka e toki faka’aho ‘a e hopo lahi ki ‘amui ange. Na’e fakahā ‘e he Fakamaau´ ‘oku ne tali eni he ‘oku ne tui ‘e ngalingali mālohi e ngaahi ‘eke mei he Kau Faiongoongo CNN, MS Now mo e Politico makatu’unga ‘i he ngaahi poini fakalao ‘oku nau ‘oange´.
