NUKU’ALOFA 11 SEPITEMA – ‘Oku muimui’i ‘e he 88.1FM / Kalonikali Tonga ‘a e talanga’i Fakafale alea ‘o e Lipooti Fakata’u ‘a e ‘Atita Seniale ki he ta’u 2024-2025 pea ko e hoko atu eni ‘i he ongoongo na’e ‘osi tuku atu kimu’a heni.
Ngaahi Tō Nounou ‘i he Tonga Power Ltd
‘Oku fehu’ia ‘e he Lipooti ‘a e ‘Atita Seniale ‘a e Lipooti Fakata’u ‘a e Tonga Power Ltd. ‘Oku pehe ko e fakamatala na’e ‘oange kia kinautolu´ ‘oku ‘ikai kakato. ‘Oku ‘i ai ‘a e ngaahi pa’anga lahi ‘oku ‘ikai ma’u ha fakamatala tonu ki ai. ‘Oku ‘i ai ‘a e ngaahi ‘akauni kehekehe ‘oku ‘ikai mahino pe ko e ngaahi nō ko eni´ na’e makatu’unga ‘i he hā pea ko e hā ‘a e totongi fakamāhina ki he ngaahi nō takitaha. ‘Oku kau ki he ngaahi me’a ni ‘a e ‘ikai ‘i ai ha poate ‘i he meimei mahina ‘e tolu.
Fakafehu’ia ‘a e kau atu ‘a e Kau Minisita´ ki he Memipa ‘i he Ngaahi Komiti e Fale Alea´
Ko e ngaahi komiti ‘a e Fale Alea ‘oku talanga’i ai ‘a e ngaahi me’a ni, ‘oku toe kau atu pe ki ai ‘a e kau Hou’eiki Minisita ‘o e Kapineti´. Pea ‘oku ‘i ai ‘a e fakamatala mei he Fale Alea kuo ‘osi kamata ‘a e fakamalanga e kau minisita memipa ko eni´ ke ‘oua ‘e vakai’i faka’auliliki’i ‘a e ngaahi lipooti´, pea ‘oua ‘e fakatotolo’i e ngaahi tō nounou ‘oku ‘omai ‘e he ‘Atita Seniale.
FEHU’I MEI HE KAKAI:
- ‘E ma’a fefe ‘a e ngaue ki he Lipooti ‘a e ‘Atita Seniale ‘i he toe kau pe ‘a e kau Minisita Kapineti ki he Komiti ko eni?
- Ko fē ‘a e kuonga te tau a’u ki ai kuo ‘osi mo’oni ‘a e fai hala ‘a e kau taki´ ‘i he pa’anga tukuhau ‘o e fonua?
