TEPILE’I ‘E LORD VAEA ‘A E LIPOOTI ‘ATITA 2024-2025: LAHI ‘A E PA’ANGA MO E KOLOA ‘OKU PULI.

- Advertisement -

NUKU’ALOFA l 10 ‘AOKOSI: Ko e lipooti fakamuimui kuo fakahū atu ki he Sea ‘o e Fale Alea´, Lord Vaea, ko e lipooti ‘o e 2024-2025. ‘Oku faka’ilonga’i ai ‘a e ngaahi me’a ni:

1. Lahi ‘a e ngaahi vausia totongi ‘oku puli ‘o ‘ikai ke ‘ilo pē ‘oku ‘i fē. (Missing Payment Vouchers).
2. ‘I ai e pa’anga ‘oku ‘ikai hano lekooti ki he feitu’u mo e ‘uhinga na’e fakamoleki ki ai. (Missing paper work – money that cannot be traced).
3. Ngaahi tohi lekooti logbooks ‘oku ta’emaau mo ta’ekakato. (Incomplete logbooks).
4. ‘Oku ta’emaau mo ta’ekakato ‘a e lekooti ‘o e ngaahi koloa ‘a e Potungaue. (Asset Registers not maintained).
5. ‘Oku lahi ‘a e ngaahi koloa (me’angaue, misini, koloa) ‘oku pulia ‘o ‘ikai ‘i ai hano toe lekooti.  (Public Assets going missing)
6. Ta’efe’unga ‘a e founga tauhi mo pule’i ‘o e pa’anga pea moe taimi tōmui ‘oku toki fakahū ai ki he pangike´. (Late banking and Poor Cash Control).

Fakatatau ki he fakamatala ‘a e ‘Atita Seniale´ ki he tu’unga ma’ulalo ‘oku ‘i ai ‘a e ngaahi Potungaue Faka-Pule’anga ‘i he lolotonga ni´, ‘oku pehē na’a nau ‘atita’i ‘a e va’a ‘e 153 fakakātoa pea ‘oatu ‘a e ngaahi fakatokanga ki he tō nounou, matavaivai mo e maumau lao fakakātoa ‘e 499. ‘I he 499 ko eni´, ko e 136 pē na’e lava ‘o solova´. Ko e ngaahi tō nounou, matavaivai mo e maumau lao ‘e 353 ‘oku te’eki lava solova.   

Ko e ngaahi fakamatala fakata’u ‘a e ngaahi Potungaue Faka-Pule’anga´ ‘oku tomui hono fa’a fakahū ki he Pule’anga´ pea ‘i he taimi kuo maau ai ‘a e lipooti ki he ta’u taki taha ‘a e ‘Atita Seniale´, ‘oku ‘ikai kau ‘i he ngaahi me’a ‘oku fakamu’omu’a ke tepile’i ‘i Fale Alea ‘i he taimi na’e Sea ai ‘a Lord Fakafanua´. ‘Oku hā ‘i he ngaahi lipooti ‘a e ‘Atita Seniale´ ‘a e ngaahi me’a na’e tō nounou ai ‘a e ngaahi Potungaue taki taha pea mo ‘enau ngaahi fakahoko fatongia ki he pa’anga na’e maumau ai ‘a e lao´ kae longo pē ‘a e Fale Alea ‘i he ta’u lahi.

‘I he a’u mai ki he lipooti fakamuimui taha´ – lipooti ‘o e 2024-2025, ‘oku vave hono ‘ohake ‘e he Sea ‘o e Fale Alea´, Lord Vaea, ke tepile’i.

KO E FEHU’I MEI HE KAKAI:

1. Ko e fehu’i ki he ‘Eiki Palemia, Lord Fakafanau – ko e hā e ngaue ‘a e Pule’anga ‘oku fakahoko ki he ngaahi nounou, matavaivai mo e maumau lao ‘oku hā ‘i he Lipooti 2024-2025 ‘a e ‘Atita Seniale´?