Kuo ma’u ‘e he 88.1FM Letio ‘a e Kakai / Kalonikali Tonga hā fakamatala falala’anga ne ‘i ai ha taha ngaue Faka-Pule’anga ne tukuaki’i ki he faihala mo e maumau’i ‘o e lao ‘aki ha’ane ‘ave ha koloa ‘a e Potungaue, ‘ikai mu’aki ma’u ha ngofua mei he CEO ‘o e Potungaue.
‘I he taimi na’e ma’u ai ‘a e tokotaha ni, na’e lipooti ia ki he CEO. ‘I hono faka’eke’eke ‘e he CEO, na’e fakahā ‘e he tokotaha ngaue ko eni´ ‘o pehē, na’e ‘ikai ko ia pē kā na’e ‘i ai e toko ua kehe na’a na fakahoko ‘a e me’a tatau mo ia, pea ‘oku ‘ilo pē ki ai ‘a e Supavaisa kā ‘oku ‘ikai kau mai ‘i he ‘ene lipooti´.
Kaikehe, na’e fai tu’utu’uni ‘a e CEO ‘o e Potungaue ko eni ke tuku ‘osi ki tu’a ‘a e tokotaha ni mei he ngaue’anga Faka-Pule’anga´ ‘o ‘ikai kau ‘a e toko 2 kehe´ ‘i he tautea ko eni´.
‘Oku pehē ‘e he toko taha ko eni na’e tuku ki tu’a´, “’Oku ‘ikai tatau ‘a e Lao´ ki he toko taha kotoa pē”. ‘Oku ne tui ‘oku ‘i ai ‘a e filifili manako he Potungaue ko eni´ pea mo e founga ‘oku fakalele ‘aki ‘a e Potungaue ‘a e Pule’anga´.
Hili ange eni, na’e ‘ave ‘e ha kautaha ‘ikai Faka-Pule’anga ha lāunga ki he PSC ‘o felave’i mo e ngaue ta’efaitotonu mo maumau lao ‘a e CEO ko eni´ ‘i he koloa ‘a e Potungaue. Na’e ‘oatu ‘a e launga ko e ni fakataha mo e ngaahi fakamo’oni masila ‘o e taimi, ‘aho, feitu’u pea mo e mahu’inga ‘o e koloa na’e kaiha’asi, ‘o iku ‘a e CEO ki he vetehia.
Ko e ‘isiū eni na’e lave’i pē ki ai ‘a e ‘Atita Seniale ‘o Tonga, kā na’e ‘ikai fakakau ‘e he CEO mo e Potungaue ko eni´ ‘i he ‘enau Fakamatala Fakata’u´. Fakatatau ki he tu’utu’uni ‘a e Konisitūtone´, ‘oku ‘i he Minisitā ‘a e fatongia ke fakahū atu ‘a e Fakamatala Fakata’u ki he anga hono fakamoleki ‘o e pa’anga tukuhau ‘o e kakai e fonua´, pea ‘oatu ‘a hono fakaikiiki ‘o e ngaahi fakamole fakapa’anga kotoa pē mei he patiseti kuo tali ke ngaue’aki ‘e he Potungaue takitaha.
‘Oku ‘ikai ko ha fuofua taimi eni ‘oku hoko ai eni. Kuo ‘osi ‘i ai pe ‘a e kau ‘Ofisa Pule Ngaue kuo nau fakahoko ‘a e ngaue ko eni ‘i hono tuku atu fakakonga ‘o e ngaahi Fakamatala Fakata’u ko eni´ ki he Fale Alea ‘o Tonga´. ‘E hili mei ai ha ta’u ‘e 1 pē 2 pea toki a’u atu ‘a e ‘Atita Seniale´ ki hono fakama’opo’opo mo vakai’i ‘a e ngaahi fakamole ko eni´. ‘Oku ‘ikai ha lao ‘oku ne faka’ata ke lipooti pe ‘a e ngaahi me’a pau pea moia ke ‘oua na’a lipooti.
Ko e ngaue eni ‘oku fakaloloma ki he tu’unga lelei lolotonga fakalukufua ‘o e fonua pea pehē ki hono kakai ‘e hoko mai ‘i he kaha’u´ pea ‘oku toe fakaloloma ange ‘i he tu’unga ‘oku faka’au ai ke angamaheni ‘aki ‘o ‘ikai fakangaue’i kakato ‘a e ngaue tali-ui (accountability).
