Oku tui ʻa e niʻihi ʻoku tokoni ʻa e malisuana ke fakalahi ʻenau ivi ngāue, ka ʻoku hokohoko atu pē ʻa e puke mo e fakaʻilo hia ʻa e Kau Polisi Tonga.
NUKUʻALOFA – ʻOku hā mei he ngaahi fakamatala kuo maʻu ʻoku kei tupulaki ʻa e tokolahi ʻo e kakai ʻi Tonga ʻoku nau tō mo ifi malisuana, ʻo kau ai ʻa e kakai tangata mo e kakai fefine, lolotonga ia ʻoku toe fakalahi ʻe he Kau Polisi Tonga ʻenau ngaahi ngāue ke taʻofi ʻa e faitoʻo konatapu mo e ngaahi hia ʻoku fekauʻaki mo ia.
ʻOku pehē ʻe he niʻihi ʻo kinautolu ʻoku nau ifi malisuana ko e faitoʻo konatapu ko ení ʻoku ne fakalahi ʻenau ivi, tokoni ke ʻoua naʻa nau ongosia ngofua, pea lava ai ke nau ngāue fuoloa ange ʻi he ʻaho. ʻOku nau tui ʻoku lelei ange ai ʻenau fakahoko ʻa e ngaahi fatongia ʻi ʻapi pea pehē ki he ngaahi ngāue mamafa ʻi tuʻa, ʻo hangē ko e ngāue langa mo e ngaahi ngāue ʻoku fiemaʻu ke fakahoko vave.
ʻI he ngaahi talanoa mo e niʻihi ʻoku nau kau ki hono tō mo hono ifi ʻo e malisuana, ʻoku nau pehē ʻoku nau maʻu ha ivi lahi ange, pea ʻoku ʻikai toe lahi ʻa ʻenau fiemaʻu ke mālōlō lolotonga ʻa e ngāue. ʻOku nau pehē ko e ʻuhinga lahi ia ʻoku nau hokohoko atu ai hono tō mo hono ngāueʻaki ʻo e malisuana, tautautefito ʻi he taimi ʻoku siʻisiʻi ai ʻa e kau ngāue pe mamafa ʻa e ngāue ke fakahoko.
Ka neongo ʻa e ngaahi tui ko ení, ʻoku kei hoko atu pē ʻa e ngaahi ngāue ʻa e Kau Polisi Tonga ke taʻofi ʻa e faitoʻo konatapu mo e ngaahi hia ʻoku ne fakatupu.
ʻI ha fakamatala naʻe tukuange ʻe he Kau Polisi, naʻe fakahā ai naʻe puke ha tangata taʻu 26 mei Kolonga mo ha tangata taʻu 20 mei Pelehake hili ha ngāue fakataha ʻa e kau polisi naʻe fakahoko ʻi he ʻaho 29 ʻo Siulai 2026.
Naʻe fakaʻilo ʻa e ongo tangata ko ení ki he maʻu mo e faitoʻo konatapu, ʻo kau ai ʻa e cocaine mo e cannabis. Naʻe toe maʻu foki mo e ngaahi naunau ʻoku ngāueʻaki ki he faitoʻo konatapu taʻe fakalao, fakataha mo ha meʻatau meʻafana mo e ngaahi mahafu taʻe fakalao.
ʻOku kei tauhi ʻe he Kau Polisi ʻa e ngaahi meʻa kotoa naʻe puke ke hoko ko e fakamoʻoni ʻi he hopo ʻe fakahoko ki he fakamaauʻanga.
Naʻe toe fakaongo atu foki ʻa e Kau Polisi ki he kakai ʻo e fonua ke nau hoko ko ha hoa ngāue ʻi hono taʻofi ʻa e faitoʻo konatapu. ʻOku nau kole ki ha taha pē ʻoku ne ʻilo ki ha taha ʻoku ne maumauʻi ʻa e lao fekauʻaki mo e faitoʻo konatapu pe ngaahi meʻatau taʻe fakalao ke fetuʻutaki fakapulipuli atu ki he Polisi ʻi he fika 7401657.
ʻOku kei hoko ʻa e faitoʻo konatapu ko ha taha ʻo e ngaahi pole lalahi ʻoku fehangahangai mo Tonga, pea ʻoku pehē ʻe he Kau Polisi ʻe kei hokohoko atu pē ʻenau ngaahi ngāue fakapolisi ke maluʻi ʻa e fonua mei he ngaahi hia ʻoku tupu mei ai.
