- Advertisement -
Na’e tali ‘e he Fale Alea ke fakalahi e patiseti 2026-2027 ki he fakatau mai ha toe me’alele fo’ou ma’ae kau fakafofonga Fale Alea ki honau ngaahi vahenga fili takitaha, ‘a ia ‘e taki 2 ‘a e vahenga ‘i he me’alele.
‘Oku fakatau ‘a e ngaahi me’alele ko eni lolotonga ia ‘oku :
- 9.5% ‘a e core inflation. Ko Tonga ni ‘oku ma’olunga taha ‘i he Pasifiki ‘a e peseti hiki ‘o e core inflation.
- Lolotonga ‘i ai ‘a e no ‘a e pule’anga fakalotofonua pea mo tu’apule’anga ‘oku te’eki ke lava ‘o totongi.
- Fakalahi ‘a e patiseti ‘oku lolotonga fe’amokaki, ke fakatau ‘a e ngaahi me’alele.
- Kole pa’anga tokoni ‘a Tonga ki he ngaahi fonua muli ke fakakakato ‘aki e vahenga ‘o e kau ngaue fakapule’anga mo feau e ngaahi fatongia ‘a e pule’anga ki he kakai.
- Nounou e vai ‘i Ha’apai pea te’eki kakato ‘enau ngaahi maamakamo ‘i tahi.
- Kei tatali mai ‘a motu ke ngaahi honau ngaahi uafu.
- Fakaongoongo mo e kau toulekeleka ke hiki hake ‘enau vahe mei he $100 ‘i he mahina ki he $200 ‘i he mahina he ‘oku fakailifia ‘a e hikihiki e totongi koloa. ‘Oku ‘ikai lava ‘e he $100 he mahina ‘o feau ‘enau ngaahi fiema’u tefito.
- Te’eki lava ke fakalelei’i ‘a e matemate ‘a e ‘uhila pea mo ‘ene mamafa.
- To lalo ‘a e ‘ekonomika pea ‘alu ke toe faka’ofa ange.
- Te’eki ha tokoni fakaivia ‘o e kau ngoue ‘i Tongatapu pea mo e kotoa ‘o e ‘otumotu, ‘a ē ‘e malava tokonia ai e ‘ekonomika.
Ko e fakatau me’alele eni ‘e malava ke lau miliona pea ‘e toe totongi ‘a e faka’uli fakataha mo e ‘utu ‘o e ngaahi me’alele. Lolotonga ko ia ‘oku tofanga ‘a e toenga e fonua ‘i he faingata’ia mo e nounou fakapa’anga pea ‘i ai ‘a e ngaahi fiema’u vivili.
Ko e fehu’i – ko e ha ‘oku ngalo vave ai e ngaahi fiema’u ‘a e kakai?
