‘Oku ‘alu ke toe fakalalahi ange mo toe lahi ange ‘a e ngaahi fakamole laulau miliona ki he totongi tōmui ‘a e kamata e ngāue ‘i he Hala fakakavakava Fanga’uta´ ‘o fakatatau mo e Aleapau na’e ‘osi fakamo’oni ai e Pule’anga ‘i Sepitema 2025 pea tanu pou ‘e he ‘Ene ‘Afio King Tupou 6 ‘i ‘Okatopa 2025, kā ko eni kuo tau a’u mai eni ki Akosi 2026 ‘oku te’eki pē lava ia ke solova pē fakangata ‘a e laulau miliona mei he kakava e kakai ‘o e fonua´ oku mole mo totongi atu ‘o makatu’unga ia mei he ‘ikai ke ma’u ‘e he kau Taki ‘o e Fonua´ ha taukei ki he ngaahi ngāue langa fakalakalaka pehe ni.
Na’e pehe ‘e he ‘Eiki Palemia ‘i he taha ‘o e ngaahi fakataha mo e ngaahi kautaha faiongoongo´ ‘i he 2026, ‘oku vave ni mai ke maau ‘a e me’a fakakelekele ki he ongo tafa’aki fonua (‘Umusi mo Folaha) ‘oku lele ai ‘a e Hala Fakakavakava kae kamata ‘a e ngaue´.
Pea ‘i he ‘Ene polokalama pea mo Viola Ulakai, CEO ‘o e TBC ‘i he ‘aho Tusite 11 ‘o ‘Aokosi 2026 ‘oku hā ‘i he Youtube, na’a ne pehē ai na’a ne toki mea’i pē ‘i he ‘aho ko ia, ‘aho 11 ‘Aokosi 2026´ ‘oku kau mo e konga ‘o e kelekele ‘o Veikune´ ‘i Longoteme, ‘i he konga ‘api ‘oku lele ai ‘a e Hala Fakakavakava´ pea ‘oku fiema’u ke fai ki ai mo e ngāue pea ‘oku toe tuai pe ‘enau ngaue ki he kelekele´ ‘i he ta’u ni. Na’a ne toe pehe foki ai ‘oku toki fakatokanga’i hake ‘a e ngaahi matavaivai ki he project ko eni´ ‘o kau ki ai ‘a e fiema’u ‘o e Taki Ngaue pea fakahoko e ngaue ki ai. ‘Oku toe tuai mo e ngaue ‘i he vā ‘o e ngaahi kupu fekau’aki.
Kaikehe, ‘oku mahino pe ‘oku fakahoko ‘a e ngaue kae kamata ‘a e langa ‘o e Hala Fakakavakava Fanga’uta. Ko e fehu’i ‘i he Mahina ko eni ko ‘Aokosi 2026, ko e fiha eni ‘i he taimi ni ‘oku tau mo’ua ‘aki ki he McConnell Dowell Construction Ltd koe’uhi ko e kei tali ki he Pule’anga lolotonga ke fakakakato ‘a e ngāue ‘oku fiema’u ki ai´? ‘Oku ‘ikai ko e mata’i fika, hili ange ‘a e ngaahi fealea’aki ke holoki ‘a e mo’ua ko eni´. Ko e fehu’i´ ki he mata’i fika ‘o fakatatau ki he mata’i fika tautea tomui ‘oku hā ‘i he aleapau ngāue na’e fakamo’oni ki ai ‘a e Pule’anga Tonga.
