NUKU’ALOFA: Fakafehu’i ‘e he lipooti ‘atita´ ‘a e Potungaue Tonga Asset Managers and Associates Ltd (TAMAL) 2023-24 ‘i he peesi 104 ‘o e Lipooti ‘Atita Makehe ‘o Sune 2025. ‘Oku fakafehu’i ‘e he ‘Atita Seniale ‘a e tu’unga totongi ‘o e ngaahi fakamole´ pea mo e tu’unga na’e fakahū atu ai ‘a e $7.4 Miliona ko e grants mei he pule’anga ‘o e 2023-2024 ki he kautaha TAMAL.
‘Oku hā ‘i he peesi ko eni´, ‘oku ‘i ai ‘a e $7 Miliona tupu ‘oku pehē ‘e he ‘Atita Seniale, ko e fakamatala pa’anga ki he ngaahi fakamole´ ‘oku ‘ikai mahino mo ‘ikai tatau mo e lekooti totonu ‘oku ma’u. ‘I hono fakalea faka-Pilitania ‘oku pehe:
“THIS IS INCONSISTENT WITH ISA 20, Accounting for Government grants and Disclosure of Government Assistance.”
‘Oku ‘i ai ‘a e tō nounou heni ‘i he fakamole $6,140,501 ($6.1m) pea toe ‘a e $1,250,49, ‘oku tu’u ‘i he lipooti ko e “deferred income liability”. ‘Oku kau ki he ta’emaau ko eni ‘a e ngaahi aleapau ngaue (employment contracts) ‘o makatu’unga ‘i he ‘ikai hano lekooti. Pea koe’uhi ko ia, ‘oku ‘ikai mahino ai e ‘alunga ‘o e fakamole fakapa’anga. ‘Oku mahino heni ‘a e ‘ikai maau ‘a e tu’unga fakapa’anga ‘o e pa’anga ‘oku ‘ave ki he TAMAL ‘e he Pule’anga pea ‘oku fakafehu’ia ai e lau miliona mo e founga hono fakamoleki´.
