Ko e konga faka’osi eni ‘a e fepotalanoa’aki mo e Adaptive Lead and Strategic Support ‘a e WCCC, Mrs. ‘Ofa Guttenbeil Likiliki, ‘a ia na’e tuku atu ‘a e kong a’uluaki ‘i he ‘aho 27 Siulai 2026.
Tonga Chronicles / 88.1FM People’s Radio: Na’e ‘i ai nai ha fa’ahinga fakafe’atungia ki he Fono lolotonga e ‘aho ‘e 3 na’e fakahoko ai?
Adaptive Lead and Strategic Support of WCCC – Mrs. ‘Ofa Guttenbeil Likiliki:
‘I hono fakakatoa, na’e lele lelei ‘a e Fono. Ko hano fakahoko ha fa’ahinga me’a ‘i he lahi na’e ‘i ai ‘a e Fono, ‘oku ‘i ai ma’u pe hono ngaahi pole ki he anga hono fokotu’utu’u, tautautefito ki hono fakafekau’aki ‘okinautolu na’e kau mai mei he kotoa e tukui motu, ka na’e malava ikuna’i kotoa eni fakafounga ‘i he timi ngaue malohi mo e palani na’e fakakaukaua lelei. Ko e laumalie ‘o e Fono ‘i he kotoa e ‘aho ‘e tolu na’e fakahoko ai, na’e ma’u e laumalie ‘o e fengaue’aki, feveitokai’aki mo e tukupa loto’aki ke a’usia ‘a e ola na’a mau loto tatau kotoa ki ai.
Tonga Chronicles / 88.1FM People’s Radio: ‘I he hili ange ‘a e Fono, ko e ha leva e ngaue ‘oku hoko atu ki ai?
Adaptive Lead and Strategic Support of WCCC – Mrs. ‘Ofa Guttenbeil Likiliki:
Ko e lolotonga ni, ‘oku hiki leva ‘emau tokanga ki he fakahoko e ngaue na’e alea’i ‘i he Fono. Ko e ngaue hoko mai ko hono fakakakato e Tu’utu’uni Ngaue ki he Fakahoko Ngaue mo e hono Sivisivi’i (Implementation and Monitoring Framework), fokotu’u ha ngaahi founga ki hono fakafekau’aki e fakahoko ngaue, pea ngaue fakataha mo e Pule’anga, ngaahi komiuniti, ngaahi hoa ngaue fakalakalaka mo e sosaieti sivile ke liliu ‘a e ngaahi tukupa ‘a e kakai fefine ki ha ngaue ‘oku hoko mo’oni.
Tonga Chronicles / 88.1FM People’s Radio: Ko e ha ‘a e taumu’a fakalukufua ‘oku taumu’a ki ai ‘a e Fono?
Adaptive Lead and Strategic Support of WCCC – Mrs. ‘Ofa Guttenbeil Likiliki:
Ko e taumu’a taupotu taha ke fakalakalaka ‘a e mo’ui ‘a e kakai fefine mo e fanau fefine ‘i Tonga kotoa. ‘Oku mau faka’amu ke fakapapau’i ‘oku kei takiekina ‘e he le’o ‘o e kakai fefine ‘a e ngaahi tu’utu’uni fakafonua pea ‘oku tataki ‘e he ngaahi me’a na’e faka’ilonga’i ‘i he Fono, ko e ngaahi me’a ia ‘oku fakamu’omu’a (priorities), ki ha ngaahi famili ‘oku malohi ange, ngaahi komuniti ‘oku malu ange, ngaahi faingamalie ‘oku lelei ange pea mo ha liliu lelei tu’uloa ki he to’utangata ‘i he kaha’u.
Tonga Chronicles / 88.1FM People’s Radio: ‘I he hoko atu ko eni e ngaue mei he Fono, ‘oku ‘iai ha me’a ‘e ala tokoni atu ai e Tonga Chronicle/88.1 FM ki hono fakaa’usia ‘a e ngaahi taumu’a ‘a e Fono?
Adaptive Lead and Strategic Support of WCCC – Mrs. ‘Ofa Guttenbeil Likiliki:
Mo’oni ‘aupito. ‘Oku ‘i ai ‘a e fatongia mahu‘inga ‘o e mītiá ‘i hono tauhi ‘a e fetalanoa‘akí. ‘Oku mau ‘amanaki ‘e hokohoko atu ‘a e Tonga Chronicle mo e 88.1 FM ‘i hono faka’ilo ‘o e ngaahi ngaue ‘a e Tonga Women’s Platform for Action, fevahevahe’aki ‘a e ngaahi talanoa fakalakalaka ‘a e ngaue, fakalotolahi’i ‘a e talanoa fakakomiuniti pea tokoni ki he lau’ilo mo e fakafekau’aki ‘a e kakai ‘i he nga’unu ki mu’a ‘a e fakahoko ngaue
Tonga Chronicles / 88.1FM People’s Radio: Ko e ha ha popoaki ‘oku ke faka’amu ke tuku atu ‘e he 88.1FM/Tonga Chronicle fekau’aki pea mo e Fono Fakafonua ‘a e Kakai Fefine ke lau’ilo ki ai ‘a e kakai?
Adaptive Lead and Strategic Support of WCCC – Mrs. ‘Ofa Guttenbeil Likiliki:
Neongo pe kuo lava lelei ‘a e Fono Fakafonua ‘a e Kakai Fefine, ka ko e kamata’anga pe ‘eni. Ko e Fala Fofola ki he Ngaue ‘a e Kakai Fefine ‘o Tonga ‘oku ‘a e Tonga kotoa ia. ‘Oku fakafalala ‘a e ikuna e ngaue ko eni ‘iate kitautolu kotoa – Pule’anga, ngaahi komiuniti, ngaahi siasi, sosaieti sivile, sekitoa taautaha mo e ngaahi hoa ngaue fakalakalaka – ke tau ngaue fakataha ke liliu ‘a e le’o ‘o e kakai fefine ki ha ngaue ‘uhingamālie ‘oku ‘aonga ki he fonua kotoa.
Tonga Chronicles / 88.1FM People’s Radio: ‘Oku fakahoko atu ‘a fakamalo loto hounga mo’oni kiate koe Mrs. Likiliki ‘i ho’o tuku taimi mo ‘omai faingamalie ke fakahoko ai e fepotalanoa’aki ko eni fekau’aki pea mo e fuofua Fono Fakafonua ‘a e Kakai Fefine ‘i Tonga. Fakamonu atu ki he ngaahi ngaue kotoa pe ‘i he kaha’u pea fakatauange ke fakaola mei langi ‘a e ngaahi ngaue lelei kotoa pe ‘oku mou fakahoko. Malo ‘aupito.
