‘I he ‘aho Tusite 7 Siulai 2026, na’e faka’atā ai ‘e he Komiti ‘Olimipiki Fakamāmani Lahi´ (International Olympic Committee – IOC) ‘a Lūsia ke toe lesisita fo’ou mai ‘enau kau va’inga mo e kau fe’auhi´ ki he va’inga ‘olimipiki ‘oku ‘amanaki fakahoko ki Los Angeles, ‘Amelika ‘i he 2028.
Na’e kamata hono ‘ohofi ‘e Lūsia ‘a Ukraine ‘i Fepueli 2022 pea tautea’i ai ‘e he IOC ‘a Lūsia ‘i ‘Okatopa 2023 ‘o ‘ikai ai ke nau toe kau ki he komiti ‘a e IOC pe ki he ngaahi fe’auhi fakavaha’apule’anga ‘a e ‘Olimipiki´.
Kā kuo fakaha ‘e Kristy Coventry, ko e palesiteni ‘o e IOC, ‘i ha fakataha mo e kau faiongoongo´, ‘oku ‘ikai ‘uhinga ‘a e fakakau mai ko eni ‘a Lusia ‘oku poupou ai ‘a e IOC ki he tau pe ko e fakamamahi ‘I ha fa’ahinga tu’unga pē. Na’a ne toe pehe ‘oku fakatokanga’i ‘e he IOC ‘oku ‘ikai totonu ke fakangatangata ‘a e kau ‘a ha tokotaha sipoti ‘i ha fe’auhi fakavahapule’anga tupu mei he kau ‘a honau pule’anga´ ‘i ha tau pe feke’ike’i pea ‘i he lotolotonga ‘o e fakautuutu ‘a e ta’epau mo e fepakipaki fakaemāmani lahi, kuo pau ke pukepuke ‘e he IOC ‘a ‘ene misiona ke fakatolonga ha tu’unga sipoti fakamāmani lahi ‘oku fakatefito ‘i he ngaahi tu’unga ‘ulungaanga mahu’inga mo fakaemamani lahi ‘a ia ‘oku ne ‘omi ha ‘amanaki lelei ki mamani.
Lolotonga eni ‘oku fiefia ‘a e kau ‘ofisiale ‘a Lūsia ‘i hono toe fakafoki atu ‘enau kau fe’auhi ki he ‘Olimipiki´. Ko e lolotonga koia e taimi na’e tuku ai kinautolu ki tu’a´, na’e fe’auhi pe ‘enau kau sipoti´ ‘i he ngaahi fe’auhi fakavaha’apule’anga ko e ‘kau sipoti tu’u ‘ata’ata’ ‘o ‘uhinga ‘oku ‘ikai ke nau lava fakafofonga’i honau fonua´.
