‘I he 2020, na‘e fakamo‘oni ai ‘a e Potungāue ‘o e Ngaahi Ngāue Lalahi ‘a Tonga pea mo e Kautaha Inter-Pacific Ltd. ki he aleapau ngāue tanu hala. ‘I he 2022, na‘e kaniseli heni ‘e he Potungāue ‘o e Ngaahi Ngāue Lalahi ‘a Tonga ‘a e ngāue ko ‘eni. Na‘e makatu‘unga heni ‘a e faka‘ilo ‘e he kautaha ni ‘a e Pule‘anga Tonga, pea tala tu‘utu‘uni ai ‘a e Fakamaau Lahi ko Justice Whitten KC (CV662022) ‘i he 2023, ke totongi ‘e he Pule‘anga Tonga ki he Inter-Pacific Ltd. ‘a e ngāue na‘a nau fakahoko ‘o fakatatau ki he ‘enau aleapau ngāue. ‘Oku a‘u ki he ‘aho ni, ‘oku te‘eki ke totongi ‘e he Pule‘anga Tonga ‘a e mo‘ua ko ‘eni.
‘I he ‘aho 27 ‘Epeleli 2026, na‘e tu‘utu‘uni ai ‘e he Fakamaau‘anga Lahi, Justice Tupou KC ‘i he keisi fika CV 40/2022, ki he Inter-Pacific Ltd. ke totongi ‘a e $2 miliona tupu ki he Pangikē Langa Fakalakalaka ‘o Tonga. ‘Oku fekau‘aki ‘eni pea mo e nō $4 miliona ‘a e kautaha ni, ‘i he aleapau ngāue ko ‘eni mo e Pule‘anga Tonga ‘i he 2020. Na‘e fakahū ai heni ‘a e tangi ‘a e kautaha ni ki he Fakamaau‘anga Tangi ‘a Tonga, koe‘uhi ‘oku ‘i ai ‘a e tu‘utu‘uni Fakamaau‘anga ‘e ua kuo ‘osi fakahoko ki he me‘a tatau pē ko ‘eni. Na‘e ‘oatu fakataha ‘a e tangi ko ‘eni pea mo e kole ke ‘STAY’ ‘a e tu‘utu‘uni ‘o e CV 40/2022, kae ‘oua leva kuo ‘osi ‘a e hopo Tangi AC 8/2026.
‘I he hopo CV 66/2022, na‘e tala tu‘utu‘uni ai ‘a e Fakamaau Lahi – Justice Whitten KC – ke totongi ‘e he Pule‘anga Tonga ki he Inter-Pacific Ltd. ‘a e ngāue kuo ‘osi fakahoko ‘e he kautaha ni. Na‘e te‘eki ke fakahoko ‘e he Pule‘anga Tonga ‘a e totongi ko ‘eni. ‘I he hopo CV 40/2022, na‘e tala tu‘utu‘uni ai ‘a e Fakamaau Lahi – Justice Tupou KC – ke totongi ‘e he kautaha Inter-Pacific Ltd. ‘a e $2 miliona tupu ki he Pangikē Langa Fakalakalaka ‘o Tonga, ko e toenga nō $4 miliona ia na‘e fakahoko ‘e he kautaha mei he aleapau ngāue pea mo e Pule‘anga. ‘Oku tangi ‘a e Inter-Pacific Ltd. – AC 8/2026 – ki he Fakamaau‘anga Tangi, koe‘uhi ‘oku ua ‘a e tu‘utu‘uni fakamaau‘anga ki he keisi tatau pē.
‘I he tu‘utu‘uni ‘a e Fakamaau Lahi, Justice Whitten KC (CV 66/2022), ‘oku fakafuofua ki he pa‘anga ‘oku ‘i he lauimiliona lahi ‘e totongi ‘e he Pule‘anga Tonga ki he kautaha ni. ‘I he‘ene tu’u ‘i he taimi ni, ‘oku lahi ange ‘a e pa‘anga ‘e fiema‘u ke totongi ‘e he Pule‘anga Tonga ‘i he $2 miliona tupu ‘oku pehē ‘e he Pangikē Langa Fakalakalaka ‘o Tonga ‘oku mo‘ua ange ai ‘a e kautaha Inter-Pacific Ltd.
‘Oku te‘eki ke ‘aofangatuku ‘a e Fakamaau‘anga ki he hopo Tangi AC 8/2026, pea koe‘uhi ko ia, ‘oku pelepelengesi ke fai ha lave fakaikiiki ki he me‘a ni. Ka ‘oku tuku atu ‘a e ongoongo ni he ‘oku ‘ohake ‘i he mītia fakasōsiale (social media) ‘a e keisi ko ‘eni.
Kaikehe, ‘oku ‘ohake heni e fehu’i tatau – Ko Tonga´, ko ha fonua ia ‘oku malava ke ‘i ai ha’a ne mo’ua ‘oku tupu mei he founga fakahoko fatongia ‘a e Pule’anga´, lolotonga ‘oku lele ‘i ha Patiseti Nounou ‘aki e $38 miliona ‘i he 2026 – 2027´?
