Fakatokanga ʻa e Pangikē Pule: Kei Tufaki Holo ʻa e Lauʻi Paʻanga $100 Loi ʻi Tonga
Kuo tuku mai ʻe he Pangikē Pule Fakafonua ʻo Tonga ha fakatokanga ki he kakai ʻo e fonua hili hono fakapapauʻi kuo toe maʻu ha ngaahi lauʻi paʻanga loi ʻi he paʻanga $100 ʻo e paʻanga foʻou naʻe tuku atu ʻi he 2023, ʻa ia ʻoku ʻi ai ʻa e ʻīmisi ʻo ʻEne ʻAfio, Tupou VI.
Fakatatau ki he Pangikē Pule, kuo ʻiloʻi ʻoku lolotonga ngāueʻaki mo tufaki holo ʻa e ngaahi lauʻi paʻanga loi ko ʻeni ʻi he ngaahi fefakatauʻaki ʻi he fonua. ʻOku ʻikai ke ʻi ai ʻi he ngaahi paʻanga loi ni ʻa e ngaahi fakaʻilonga maluʻi fakapulipuli ʻoku totonu ke maʻu ʻi ha lauʻi paʻanga moʻoni.
Naʻe fakamatala ʻa e Pangikē Pule ko e ngaahi meʻa mahuʻinga ke vakaiʻi ʻi ha lauʻi paʻanga moʻoni ʻoku kau ai:
- ʻI he tafaʻaki toʻohema ʻo e lauʻi paʻanga, ʻoku totonu ke hā ʻa e ʻīmisi ʻo ʻEne ʻAfio Tupou VI mo e foʻi lea “NRBT” ʻi he watermark, ʻa ia ʻoku toki hā lelei pē ʻi hono puke hake ki he maama.
- Ko e filo maluʻi lanu pingikī (security thread), ʻa ia ʻoku hā feliliuaki ai ʻa e matalaʻi heilala mo e kupesi ʻi ha laine tuʻu mei ʻolunga ki lalo ʻo e lauʻi paʻanga.
- ʻI hono huluʻi ʻaki ha maama valeti (UV light), ʻoku totonu ke hā ai ʻa e mahuʻinga totonu ʻo e lauʻi paʻanga.
- Ko e fālahi mo e loloa totonu ʻo e lauʻi paʻanga, ʻa ia ʻoku faikehekehe mei he ngaahi paʻanga loi.
Naʻe pehē ʻe he Kovana ʻo e Pangikē Pule Fakafonua ʻo Tonga, Tatafu Moeaki, ʻoku mahuʻinga ke toe tokanga ange ʻa e kakai ʻi hono tali mo ngāueʻaki ʻa e paʻanga pepa, tautautefito ʻi he ngaahi taimi kātoanga lalahi, koeʻuhí ʻoku tui ʻa e Pangikē Pule ʻoku kei ʻi ai pē ha ngaahi lauʻi paʻanga loi ʻoku tufaki holo ʻi he fonua.
Naʻá ne toe fakatokangaʻi foki ʻoku tuʻu laveangofua ange ʻa e ngaahi pisinisi iiki ʻoku nau fakahoko ʻa e tokolahi ʻo ʻenau fefakatauʻaki ʻaki ʻa e paʻanga pepa, pea ʻoku totonu ke nau vakaiʻi fakalelei ʻa e ngaahi lauʻi paʻanga kotoa pē ʻoku nau tali.
Kuo fakahā ʻe he Pangikē Pule ʻoku lava ke maʻu ʻa e ngaahi fakamatala mo e ngaahi tohi fakahinohino fekauʻaki mo hono ʻiloʻi ʻo e paʻanga moʻoni mo e paʻanga loi ʻi hono ʻofisi pea pehē ki heʻene uepisaiti.
Naʻe toe fakamanatu ʻe he Pangikē Pule ko hono paaki fakafufū, tauhi pe ngāueʻaki ʻo ha paʻanga loi ko ha hia mamafa ia ʻi he lao. ʻOku kole atu ki he kakai kapau ʻoku nau maʻu ha lauʻi paʻanga ʻoku nau masalosalo ai, ke nau lipooti leva ki he Pangikē Pule Fakafonua ʻo Tonga pe ki he ʻapi Polisi ofi taha.
Ki ha toe fakaʻekeʻeke, ʻe lava ke fetuʻutaki ki he Tafaʻaki Paʻanga ʻa e Pangikē Pule Fakafonua ʻo Tonga ʻi he telefoni 24-057 pe ʻimeili nrbt@reservebank.to. ʻOku toe maʻu foki ʻa e ngaahi fakamatala lahi ange ʻi he uepisaiti ʻa e Pangikē Pule.
