NUKU’ALOFA: Kuo kakato e sea ‘e 12 ‘o e kapineti´ ‘o fakatatau mo e Konisitūtone´ ‘aki hono fakanofo ‘a Hon. Tevita Fatafehi Puloka ko e Ministā ki he Ngaahi Ngāue Lalahi´ kā ko e fakafofonga ia e kakai ‘o Tongatapu 2. Ko e fetongi eni ‘e Hon. Tevita Puloka ‘a Hon. Semisi Sika, hili ia ‘a e mole hono sea´ ‘i Tongatapu 2´. ‘Oku toe fakanofo mo Dr Siale ‘Akauola ke toe foki mai ‘o hoko atu ko e Ministā Mo’ui, ‘o kamata ngāue he ‘aho 17 ‘o ‘Aokosi 2026. Ko e fetongia tu’unga Minisitā eni mo Hon. Hu’akavameiliku, ‘a ia na’e ‘osi fakanofo Minisitā Mo’ui ‘i Sanuali 2026, hili ia ha mahina ‘e 6 kuo toe fetongi. Toe fakanofo mo Hon. Vika Sivoki Lavemaau ko e Minisita Pa’anga fo’ou ‘a ia ko e fetongi ‘aki eni hono tolu ‘i he lakanga Minisita Pa’anga. Ko e ‘uluaki Minisitā Pa’anga´ ko Hon. Tangimana ‘i Faingata’a mei Niua 17, ‘a ia na’e fakanofo Minisitā ia ‘i Sanuali 2026 pea fakafisi ia ‘i Mē 2026 ‘a ia na’e mahina pē 4. Pea hoko atu ai a Lord Fakafanua ko e Minisita Pa’anga ‘o kamata lau mei Sune 2028 ki ‘Aokosi ‘aho 16 2026, fe’unga ia mo e mahina ‘e 3 pea ko ‘aneafi ne fakanofo ai e Minisitā Pa’anga fo’ou ‘o kamata lau mei he ‘aho 17 ‘o ‘Aokosi 2026.
‘I he taimi tatau ‘oku fetongi ‘e Hon. Hu’akavameiliku ‘a Hon. Semisi Sika he ‘Eiki Minisita Takimamata´.
i he taimi tatau kuo kakato kātoa e lakanga Minisitā ‘e 12 ‘o e Kapineti´ talu ia ‘ene lele ta’e kakato mai mei Sanuali 2026 ki he ‘aho 16 ‘o ‘Aokosi 2026 meimei mahina eni ‘e 7.
‘A ia ‘i he ’ene a’u mai ki he ‘aho ni 17 ‘o ‘Aokosi 2026´, ko e kau Minisitā eni ‘e toko 12 fakakātoa. ‘A ia ko e toko 9 na’e fili mai ia ‘e he kakai mo e kau nōpele´. Pea ko e toko 3 leva na’e fili mai pē ia ‘e he Palēmia mei tu’a. Fakatatau mo e Konuistūtone´ ‘oku ‘atā ke fili mai ha taha mei tu’a ‘o a’u ki he toko 4 ‘okapau ‘oku ‘ikai ke lava ke ma’u e lelei taha ki he lakanga minisitā´ mei loto mei he fili ‘a e kakai´ ‘i he ngaahi sea ‘e 17 mei he kakai´ mo e sea ‘e 9 mei he kau nopele´.
‘I he ‘ene pehē leva, ko e toko taha pē mei he kau nōpele ‘oku taau mo e lakanga minisitā´, ‘a ia ko e ‘Eiki Palēmia ‘o Tonga pea ‘ikai ha taha ia mei he hou’eiki nōpele ‘e toko 9 ne fili mai ki ha lakanga minisitā´. ‘A ia ko e fakafofonga nopele pē ‘e 1 Ha’apai ‘oku fakanofo minisitā he to’u falealea ‘o e 2026-2029. ‘A ia ko e fakafofonga nōpele ‘o Ha’apai fika ‘uluaki´ ‘a ia ko e lakanga minisitā mo e potifolio ‘oku ne ma’u he taimi ni ‘o kamata lau mei he ‘aho ni.
1. Lakanga Palēmia ‘o Tonga
2. Minisita ki he Fakamatala ‘ea, Fetu’utaki, Feliuliuaki e ‘Ea, Ngaahi Fakatamaki Fakaenatula, pē ko ia ‘oku ‘iloa ko e MEIDECC,
3. Minisitā ki he kau Polisi
4 Minisita ki he Tamate Afi
5 Minisita ki he Pilisone
6. Minisita ki he PCS pē kau ngāue fakapule’anga
Kau miniista kehe leva:
Tokoni Palēmia Hon. Dr. Viliami Latu:
1. Minisita Lao mo e Potungaue Fakamaau’anga, pea toe fakamalumalu leva ai e Komisiona Tau’i e Faihala, ‘Ateniseniale, kau fakamaau Polisi mo e kau fakamaau lahi
2. Minisita ngaahi Trade, Innovation, Leipa,Lesisita Ngaahi Pisinisi, Fakafetauaki, mo e Leipa
Hon. Hu’akavameiliku
- Ministā Ngaahi Pisinisi e Puleanga
- 2 Takimamata
Hon. Viliami Sisifa
1. Ngoue mo e Vao’akau
2. Minisitā Toutai
Hon. Fane Fituafe
- Minisitā MIA ‘o kau ai e Sipoti, Kakai Fefine, Kau Vaivai, To’utupu
Hon. Seventeen Toumo’ua
1. Tukuhau mo e Tanaki Pa’anga Hū Mai 2 Customs mo e Vaha’a Fonua
Hon. Dr Taniela Fusimalohi
1. Minisitā Fonua, Savea, Palani mo e Ngaahi Koloa Fakanatula
Hon. Dr Mo’ale ‘Otunuku
1. Minisitā Ako mo e Ako Ngāue , ‘Univesiti Fakafonua mo e TNQAB
Tama Pilinisi Kalauni
- Potungaue Fakatipilometika moe Ngaahi Ngaue ki Muli
- 2 Taumalu’i Fonua a ‘Ene ‘Afio.
Talamonū atu e Letio ‘a e Kakai ki he Hou’eiki Minisitā fo’ou ko eni ‘e 3 kuo fakanofo mo e ngaahi fatongaia fo’ou kuo hilifaki ki ho’o mou uma ‘i hotau pule’anga ni.
