‘Oku kamata ‘i he ‘aho ni ‘a hono alea’i ‘i Fale Alea ‘a e Lao Fakaangaanga Fika 3 – Payment System and Services Bill 2026 mo e Lao Fakaangaanga fika 4 – National Credit Register Bill 2026.
Ko e Lao Fakaangaanga Fika 3 – Payment System and Services Bill 2026 – ko e lao eni te ne pule’i ‘a e fenga’unuaki ‘a e pa’anga´ ‘i Tonga ni: pa’anga mopaila, ualeti faka’initaneti (e-wallets), ngaahi sevesi talafi pa’anga, ngaahi sieke mo e talafi pa’anga fakapangikē pea ‘oku ne fokotu’u ‘a e Pangike Pule Fakafonua´ ko e sino ia ‘oku ne pule’i ‘a e laiseni mo e ngaahi tu’utu’uni ngāue kia kinautolu kotoa ‘oku nau fakahoko ‘a e ngaahi sevesi ko eni´.
Ko e Lao Fakaangaanga Fika 4 – National Credit Register Bill 2026 – ‘okapau kuo ke ‘osi nō pē fakamo’oni ke ke malu’i ha nō ‘o ha tokotaha kehe, ko e lao eni ‘oku fekau’aki ia mo koe. Ko e lao fakaangaanga ko eni´ ‘oku ne fa’u e tohi lesisita fakafonua ‘o e nō kotoa pea ‘oku ne fokotu’u ‘a e Pangikē Pule Fakafonua´ ko e sino ia ‘oku ne tauhi ‘a e faile ‘o e hisitolia ‘a e tokotaha nō kotoa mo malu’i ki ha nō, ‘i hono ‘ave ki ai ‘a e ngaahi fakamatala koia´ ‘e he ngaahi pangike fakakomesiale´.
Ko e ongo lao fakaangaanga eni na’e fakahū ki Fale Alea ‘i he ‘aho 9 ‘o Siulai 2026 pea ‘i he ‘ene a’u mai ki he ‘aho ni´, ‘oku te’eki tuku atu ki he kakai ‘o e fonua´ ke nau ‘ilo pea mo talanoa’i.
Ko e fehu’i mei he Kakai:
- Ko e hā e ‘uhinga ‘oku ‘ikai ai ke ‘ave ‘a e lao fakaangaanga fika 3 mo e 4 ko eni´ ki he kakai´ ke nau mu’aki ‘ilo kiai mo ‘oange ha faingamālie lelei ke talanoa’i kimu’a pea talanoa’i ‘i Fale Alea ke fakapaasi´?
- ‘E ‘oatu ha faingamālie ki he kakai ‘o e fonua´ ke nau talanoa’i ‘a e ongo lao fakaangaanga ko eni´ kimu’a pea fakapaasi´?
