Nuku’alofa, TONGA- Kuo ma‘u ‘e he Letiō 88.1 FM (Letiō ‘a e Kakai Tongá) ha fakamatala falala‘anga mei ‘Eua, fekau‘aki mo e ta‘efiemalie ‘a e masivesiva ange ‘o ‘Euá ki he totongi vai ‘i he utu‘anga vai fakapule‘angá. ‘A ia, ‘oku $10 ki he talamu lita ‘e 200, kā ‘oku $30 ki he tangike IBC tapafā hinehina lita ‘e 1,000.
Fakatatau kihe fakamatala ‘a Damon Lolomana’ia ‘oku makatu‘unga ‘a e ta‘efiemalie ko ‘ení, ihe’ene pehē ko e kāinga ‘oku masivesiva angé ‘oku nau talamu pē nautolu; ‘ikai ke a‘u honau ivi fakapā‘angá ki ha tangike tapafā lita ‘e 1,000. Ko e malo pē mo e nge‘esi talamú ke utu ai hanau vai. Pea kapau ‘oku nau ‘alu atu mo honau nge‘esi talamu ‘e 5, ‘oku $50 ia ki he lita ‘e 1,000, ka ko e ni‘ihi ai leva ‘oku ‘i ai ‘enau tangike tapafā lita ‘e 1,000, ‘oku pā‘anga pē ‘e 30.
‘Oku fehu‘ia mo ta‘efiemalie ‘a e kāinga ‘o ‘Euá, pē na‘e anga fēfē hono fakakaukau‘i ‘e he pule‘angá ke ‘i ai e lita ‘e 1,000 ‘oku $50, pea lita ‘e 1,000 ‘oku $30? Fēfē kapau na‘e fokotu‘u pē ‘e he pule‘angá ha mahu‘inga pe totongi tu‘uma‘u ki he vaí?
Kapau ‘oku $30 ae lita e 1,000 oku totonu leva ke $5 ai leva ae lita 200 koeuhi ke oua e totongi $30 ha niihi kihe lita 1,000 pea totongi $50 ae niihi kihe lita 1,000.
‘Oku toe hoha‘a foki ‘a e kāinga funga fonuá ki he pule‘angá, ‘o kole ke toe fakahoko ha vili vai, ko e‘uhi ko e vili vai fakakātoá pē ‘e 2 ‘i ‘Eua. Pea ‘oku nau fakafalala kotoa ‘a e kakai fakafuofua ki he toko 4,800 ‘i he ma‘u‘anga vai ‘oku tafe ‘i he ngaahi vaitafe.
Ko e fehu‘i: Kapau ‘e hokohoko atu ‘a e El Niño ki he ta‘u fo‘oú, ‘e kei feunga aipē ‘a e vaitafē mo e vili vai ‘e 2 ki he kakai ‘e toko 4,800 ko ‘ení?
Faka’osi, oku i ai moe tokanga makehe kihe tu’unga faka mo’ui lelei ‘oku i ai a e vai i Eua. I he fakamatala a Lolomana’ia, koe vai oku fiema’u ha ngaahi housi ke lava taki aki e vai koeuhi oku taki pamu pvc pe paipa vai o utu aki e talamu, sioki moe tangike o fiema’u ke utu.
Kole ai leva ki he pule‘angá ke fakakaukau‘i ‘a hono pule‘i lelei ‘o e totongi vai fakamovetevete ‘i he taimi El Niño ko ‘ení, mo ha ngaahi tokoni kehe ki he kāinga ‘o e fonuá, ki ha ngaahi poloseki vili vai makehe ke tokoni‘i ‘aki ‘a e kakai ‘o e fonuá ‘i he taimi El Niño ko ‘eni ‘oku ‘ikai tō ai ha uhá.
