Nuku’alofa, TONGATAPU- Na‘e tautea ha ongo mātu‘a mei Havelu ki hono ma‘u kinaua mo e faitō‘o ta‘efakalao ko e kanapisi feunga mo e kalami ‘e 40.07. Ko e ongo mātu‘a ko ‘ení ko Folauhola Palanite pea mo hono mali ko Mele.
Na‘e puke loua foki kinaua ‘i he ‘aho 29 ‘o Sānuali, 2026, pea na toki hā foki ‘i he Fakamaau‘anga Lahí ‘i he ‘ao ‘o e ‘Eiki Fakamaau Acting Hon. Justice Langi ‘i he ‘aho 22 ‘o ‘Okatopa, 2026, ‘o hilifaki ‘ena tauteá.
Ko e ongo faka‘iloa ni na‘á na tali halaia ki hono ma‘u kinaua pea mo e kalami kanapisi ‘e 40.07, pea mo e ngaahi naunau faitō‘o konatapu ‘oku ‘ilo‘i ‘aki ko e hina pongo mo e nge‘esi pēketi milemila ‘e 150 ki hono fa‘o mo tufaki ‘o e faitō‘o konatapú.
Na‘e me‘a foki ‘e he ‘Eiki Fakamaáu, na‘e ma‘u foki ‘e he kau polisí ha ngaahi fakamatala fekau‘aki mo Folauhola—‘a ia ‘oku ‘ilo‘i ‘aki ‘a e hingoa ko Tusa—ko e pehē ko ‘ene fakatau atu ‘a e faitō‘o konatapú ‘i he ‘ēlia ‘o Havelú. Na‘e fetu‘utaki ai leva ‘a e Ofisa Polisi ko Masalu kia Folauhola ‘o pehē ko ‘ene fie fakatau ha faitō‘o ta‘efakalao feunga mo e $100. Na‘e fekau ai leva ‘e Folauhola ‘a Masalu ke tali ange ‘i he tōmu‘a ‘o e Havelu Middle School, kae lele atu ‘a e me‘alele ‘o ‘oatu ‘ene fakataú.
‘I he taimi nounou mei ai, na‘e a’u atu ai leva ‘a Mele mo e ki‘i fānau valevale ‘e toko 2. Na‘e taofi leva ia ‘e he kau polisí ‘o hua ‘ene me‘alelé, ‘o fakahā ange ‘e Mele ‘a e pēketi kanapisí. Na‘e hoko atu ai leva ‘a e kau polisí ki he ‘āpinofo‘angá ‘o hua, ‘o ma‘u hake ai ‘a e nge‘esi milemila ‘e 150 mo e hina pongo ki he ifi ‘o e faitō‘o ta‘efakalao ko ‘ení.
Na‘e tōmu‘a faka‘ikai‘i ‘e Mele, ‘o pehē na‘e ‘ikai tene ‘ilo ki he faitō‘o ta‘efakalao ko ‘ení, ka ko ‘ene ave pē ‘a e ki‘i pēketi na‘e kole ange ‘e hono malí kene ‘alu ‘o omai mei he lalo akaú ‘o tiliva ki he feitu‘u na‘e puke ai ia ‘e he kau polisí.
‘I he ‘aho 30 ‘o Sānuali, 2026, na‘e a‘u atu ai leva ‘a Folauhola ki he ‘api polisí ‘o eke pe ko fē hono malí, pea ne tali halaia aipē ko e ta‘efakalao pē ia ‘a‘ana tokotaha.
Neongo na‘e tautea ngāue pōpula ‘a Mele ki he māhina ‘e 15, na‘e toe mēesi pē ‘a e ‘Eiki Fakamaá ‘o tolōi hono tauteá ‘i he ta‘u ‘e 2 ko e‘uhi ‘oku ‘ikai ha‘ane leko’oti fai hia. Na‘e tautea ngāue pōpula ai leva ‘a Folauhola ki he māhina ‘e 21, kae mēesi ‘a e ‘Eiki Fakamaáu ‘o tolōi ‘a e māhina ‘e 6 hono tauteá, ka ne ngāue‘i pē ‘a e ta‘u ‘e 1 mo e māhina ‘e 3.
