NUKU’ALOFA: ‘I he ‘aho 14 ‘Aokosi 2026, na’e fakahoko ai ‘a e Press Conference ‘a e kau CEO ‘o e ngaahi Potungaue Fakapule’anga´ pea mo e ngaahi Kautaha Faiongoongo´ ‘i he St. George Building. Na’e ‘alu ki ai ‘a e faiongoongo’a e 88.1FM Letio ‘a e Kakai´ pea ‘i he ‘ene a’u atu ki he matapā hū ki loto´, na’e ta’ofi atu ia ‘e he tokotaha ngāue security ke ‘oua na’a hū ki loto.
‘I he fai fononga mai hono fakahoko ‘o e Press Conference pea mo e ‘Eiki Palemia ‘o Tonga´ ‘i he laui ta’u ki mu’a´, ko e fuofua taimi eni ke hoko ai ha fakato’onga pehe ni. Mei he Pule’anga ‘o Hon. Hu’akavameiliku pea ha’u ai ki he Pule’anga ‘o Hon. Dr. ‘Aisake Eke, na’e te’eki ha faiongoongo ‘e ta’ofi ke kau atu ki he Press Conference. Ko e fuofua taimi eni ‘i he hisitolia ‘o e Press Conference ‘i Tonga ni´ ke hoko ai ha me’a pehe ni.
Fakatatau ki he ngaahi a’usia ‘a e 88.1FM Letio ‘a e Kakai´ pea mo e ‘Eiki Palemia Lolotonga´, ko e ngaahi me’a eni kuo nau ‘osi fou mai ai:
A. ‘I Ma’asi 2026, na’e ta’ofi ai ‘a e 88.1FM ke toe ‘alu ange ha taha ‘i he ‘ene kau ngāue mo ha me’afaitā ‘ata mo e lea, ke hiki fakahangatonu ‘a e ngaahi Press Conference. Kā ‘oku faka’ata ‘a e ngaahi lētiō kehe ke nau hū mo ‘enau ngaahi me’afaitaa´ ‘o hiki mo lekooti lolotonga e lele ‘a e Press Conference.
B. Na’e fononga mai ai ‘a e 88.1FM ‘o a’u ki he fakahoko ange ‘e fakahokohoko pē ‘a e fehu’i´ pea ke taki taha pē ‘a e fehu’i. Kā ‘i he lele ‘a e Press Conference, ‘oku taki lahi ‘a e kau faiongoongo kehē ‘i he ngaahi fehu’i.
C. Na’e toe ‘i ai e taimi na’e tu’utu’u ni ai ki he 88.1FM ke ‘oua na’a fai ha fehu’i noa’ia kae. ‘E fakafika ‘a e fakafehu’i ‘o fakatatau ki he ‘uluaki a’u ki he Press Conference pea fakahokohoko ‘aki ia e fetongitongi ‘o e ‘eke fehu’i´. ‘I he ngaahi taimi, ko e fuofua a’u atu ki he Press Conference ko e 88.1FM, ki mu’a pea kamata koe’uhi ke ne ma’u ‘a e fika 1´. Kā ‘oku ‘ikai ke ‘oange ki ai ‘a e fika 1. ‘Oku ‘ave ia ki he faiongoongo kehe na’e toki a’u atu.
D. ‘I he ‘ene a’u mai ki Siulai, na’e fakatokanga’i ai ‘oku totongi ‘e he ‘Eiki Palemia ‘a e ngaahi Kautaha Faiongoongo kehe´ ke kau ange ki he ‘ene Press Conference kā ‘oku ‘ikai ke ne fakakau ‘a e 88.1FM ‘i he monu’ia ko eni´.
E. Na’e fakahoko atu ‘e he 88.1FM ‘i Sune ‘a e kole faingamalie ke faka’eke’eke makehe ‘o ia mo e te’eki pe ke ‘i ai ha’ane tali mahino ki ai neongo ‘a e toutou muimui’i atu e tu’unga ‘oku ‘i ai ‘a e kole faingamalie ko eni´. Lolotonga ko eni´ ‘oku ne tali ‘e ia ‘a e ngaahi Kautaha Faiongoongo kehe´ ke faka’eke’eke makehe ia.
F. Ko e fakamuimui eni ‘i he ‘aho 14 ‘Aokosi 2026, ko e ta’ofi ‘e he security ‘i he matapa hu ki loto ‘i he St. George e faiongoongo ‘a e 88.1FM ke kau atu ki he Press Conference.
‘Oku hā ‘o ngali mei he ngaahi a’usia ko eni e 88.1FM ‘a e ‘Eiki Palemia lolotonga´, ‘oku ‘i ai ha filifili mānako ‘i he fakahoko ngāue ‘a e ‘Eiki Palemia´ ki he ngaahi Kautaha Faiongoongo´.
Hange ‘oku ‘atā ‘a e faiongoongo kehe´ ke faita, fakafehu’i pea fakafehu’i tu’o lahi, totongi pea lava faka’eke’eke makehe ‘o ia, kae fakangatangata ‘a e 88.1FM mei he kotoa ‘o e ngaahi me’a ni.
Ko e totongi ‘o e ngaahi Kautaha Faiongoongo ke kau atu ki he ‘ene Press Conference, ‘oku totongi ia mei he pa’anga totongi tukuhau ‘a e fonua kae ‘ikai ko e pa’anga fakafo’ituitui ‘a ha taha ke pule pē ko hai ‘e totongi, mo hai ‘e ‘ikai totongi. ‘Oku totonu ke potupotu tatau ‘a e tufa ‘o e totongi ko eni´ he ko e pa’anga totongi tukuhau ia ‘a e fonua´.
Ko e ta’ofi ke ‘oua na’a kau atu ki he Press Conference ‘o e Falaite 14 ‘Aokosi 2026, ‘oku ‘ikai ‘oange ha ‘uhinga pea te’eki ke fakahoko ki he 88.1FM ha fa’ahinga fanongongo ta’ofi fakapepa, ke hā ai ‘a e ngaahi makatu’unga´. ‘Oku ‘ikai ko ha to’onga fakapolofesinale eni ‘i ha fa’ahinga ‘api ngaue pe.
‘I he ngaahi tu’unga ko ia, ‘oku ‘i ai ‘a e fifili pe ko e ha ‘a e ngaahi makatu’unga? ‘Okapau na’e maumau’i ‘e he 88.1FM ha kupu’i lao, ko e hā ‘a e ngaahi kupu’i lao ko ia´ pea na’e anga fēfē hono maumau’i ‘e he 88.1FM ‘a e ngaahi kupu’i lao ko ia´? ‘Okapau leva na’e ‘ikai ha kupu’i lao na’e maumau’i ‘e he 88.1FM, ko e hā ‘a e makatu’unga ‘o e totonu na’e fakahoko ‘aki ‘a e ta’ofi´?
Tanaki atu ki heni, ‘oku hā ‘o ngali mei he fakato’onga ‘a e pule’i mo hono takiekina ‘o e Press Conference, ‘oku ‘ikai fetaulaki ‘a ‘enau tu’utu’uni ‘oku tala´ pea mo ‘enau pule’i ‘a e tauhi ‘o ‘enau ngaahi tu’utu’uni´. ‘Oku fehu’ia heni ‘a e tu’unga ‘oku ‘i ai ‘a e poto’i taukei ngaue ‘o e fakalele ‘o e Press Conference. ‘Oku hā mai ‘oku ‘ikai ke lelei ‘a e tu’unga poto’i taukei ngaue´. ‘I he tu’unga leva ko ia´, ‘oku ne toe fakalahi ‘a e tu’unga fifili´ pē ko e toe hā nai ‘a e ngaahi tafa’aki ‘oku ‘ikai tu’unga lelei ai ‘a e poto’i taukei ngaue?
Ko e faka’osi, ‘i he tu’unga ko eni ‘o hono fakakehekehe’i ‘o e Kautaha Faiongoongo 88.1FM, ko e ha ‘a e makatu’unga? Ko e tupu mei fe ‘a e ngaahi makatu’unga ko ia? Ko e hā ha fa’ahinga fua fatongia ‘a e 88.1FM na’e tō nounou ai ‘i hono tu’unga ko e faiongoongo, ke vahe’i ai ia ki he tafa’aki?
Ko e faiongoongo´, ko e konga ia ‘o e pule’anga kotoa pe ‘oku ne taukave’i ‘a e pule lelei´ mo e ‘ata ki tu’a e fai fatongia ‘o e taki´ – Palemia mo e Pule’anga´. ‘I Fisi mo mamani, ‘oku ‘i ai ‘a e pateseti makehe mei he tukuhau ‘a e kakai ‘oku ‘ave ki he kau faiongoongo koe’uhi ko honau fatongia ko e kulī le’o ‘o e pule’anga´ ke fakasi’isi’i e faihala´, kākāa moe ta’efaitotonu. Ko e taha ‘o e ngaahi fatongia ‘o e faiongoongo ‘i ha pule’anga fakatemokalati ‘i mamani ko hono monitoa ‘a e fua fatongia ‘a e pule’anga, tuku atu ki he kakai´ ha fa’ahinga faihala pea ‘eke ‘a e ‘ata ki tu’a mo e fakamaau totonu. ‘Oku hoko ‘a e ngaahi Kautaha Faiongoongo´ ko ha fehokotakinga ia ‘i he vaha’a ‘o e pule’anga´ pea mo e kakai ‘o e fonua´, ako’i pea mo faka’ilo ki he kakai´ ‘a e tu’unga ‘oku ‘i ai ‘a e fonua´ pea hoko ko e le’o ki he fonua´ ‘i hono siofi ke tauhi ‘a e kau taki´ mo e ngaahi potungaue´ ki he tali ui ki he ngaahi founga fua fatongia ‘oku nau fakahoko´. ‘Oku fakataumu’a kotoa eni ki he lelei fakalukufua ‘a e fonua kotoa pē.
