Foaki ʻa e Ngaahi Ki ki he Fale Foʻou ʻe 57 ʻi he Polokalama Tapanekale
Naʻe fakahoko lelei ʻi he ʻaho Monite, 13 ʻo Siulai 2026, ʻa hono foaki ʻo e ngaahi ki ki he fale foʻou ʻe 57 naʻe langa ʻi he malumalu ʻo e Polokalama Tokoni Fale ʻa e Puleʻanga, ʻa ia ʻoku ʻiloa ko e Polokalama Tapanekale.
Ko e ngaahi fale ko ʻeni ʻoku ʻi Tongatapu mo ʻEua, pea naʻe foaki fakakatoa ʻa e ngaahi ki ki he kau maʻu fale ʻi ha ouau makehe ke fakaʻilongaʻi ʻa e kakato ʻo e polokalama.
Naʻe fakataumuʻa ʻa e polokalama ki hono tokoniʻi ʻo e ngaahi famili naʻe maumauʻi pe mole honau ngaahi ʻapi nofoʻanga tupu mei he ngaahi fakatamaki fakanatula mo e vela afi, pea pehē foki ki he ngaahi famili ʻoku nau nofo ʻi ha tuʻunga masivesiva ʻo ʻikai malava ke langa haʻanau fale ʻaki pē ʻenau ngaahi maʻuʻanga paʻanga.
Naʻe fakahaaʻi ʻe he tokolahi ʻo e kau maʻu fale ʻenau houngaʻia mo e fiefia lahi ʻi hono maʻu ʻo e ngaahi ʻapi foʻou ni, ʻa ia ʻoku kakato ai ʻa e loto fale, konga ki he peito mo e loki mohe ʻe ua. ʻI he niʻihi ʻo e ngaahi fale, naʻe toe fakakakato ai ʻa e falemalolo, faletolo mo e filita vai ke tanaki ai ʻa e vai melie. Ka ʻoku kei ʻi ai pē ha niʻihi ʻoku teʻeki ai ke kakato ʻa e ngaahi ngāue ko ʻeni, pea ʻoku ʻamanaki ke fakakakato ia ʻi he ngaahi poloseki mo e tokoni ʻi he taʻu fakapaʻanga lolotonga.
Naʻe meʻa tonu ʻi he ouau ko e ʻEiki Minisita ʻo e Potungāue, Hon. Semisi Kioa Lafu Sika, fakataha mo e Talekita Pule Leʻoleʻo, Dr. Vinolia Salesi, pea mo e niʻihi ʻo e kau talekita ʻo e Potungāue, ke fakahoko ʻa e foaki ʻo e ngaahi ki mo fakaʻilongaʻi ʻa e tokoni mahuʻinga ʻoku fakahoko ʻe he Puleʻanga ki hono fakaleleiʻi ʻo e tuʻunga moʻui ʻa e ngaahi famili ʻoku nau fiemaʻu tokoni lahi taha.
ʻOku hoko ʻa e Polokalama Tapanekale ko ha konga mahuʻinga ʻo e ngaahi ngāue ʻa e Puleʻanga ke fakaleleiʻi ʻa e nofo ʻa e kakai, tautautefito ki he ngaahi famili kuo uesia ʻe he ngaahi fakatamaki pe nofo ʻi ha tuʻunga faingataʻa fakapaʻanga. ʻOku fakahaaʻi ʻe he polokalama ni ʻa e tukupā ʻa e Puleʻanga ke fakapapauʻi ʻoku maʻu ʻe he ngaahi famili ko ʻeni ha ʻapi nofoʻanga malu, lelei mo taau ke nau nofo ai, ʻo tokoni ki hono fakaleleiʻi ʻa e lelei fakalukufua ʻo ʻenau moʻui.
