KAUTAHA FAKAKAUNGĀMEʻA ʻO TONGA MO SIAINA (TCFA)

- Advertisement -

Ko e Kautaha Fakakaungaāmeʻa ʻo Tonga mo Siaina (pe koe Tonga China Friendship Association/TCFA) ko ha kautaha kuo lesisita ʻi he malumalu ʻo e Lao ki he Ngaahi Sosaieti Fakatahataha ʻo Tonga, pea ʻoku ʻikai fekauʻaki ia mo ha paati fakapolitikale.

Naʻe fokotuʻu ʻa e kautahá ʻi he taʻu 2009 ʻi he Puleʻanga ʻo Tonga ʻe he Taʻahine Pilinisesi Salote Mafileʻo Pilolevu Tuita, koe Pataloni ‘o e TCFA.

Vīsone – Ke fakaloloto ʻa e melino, fakalakalaka mo e femahinoʻaki fakavahaʻapuleʻanga ʻi he vahaʻa ʻo e kakai ʻo Tonga mo e kakai ʻo Siaina, ʻo fakafou ʻi he fevahevahe’aki e ngaahi ‘ilo moe koloa kae pe ki he fefakatauʻaki fakaʻekonomika, fakafonua mo fakasosiale.

Taumuʻa Ngaue – ʻOku feinga’a e TCFA ke faka’ai’ai moe fakatupulaki ʻa e feohi fakakaumeʻa, femahinoʻaki mo e fengaueʻaki ʻi he vahaʻa ʻo e kakai ʻo Tonga mo Siaina, ʻo fakafou ʻi he fefakatauʻaki mo e ngaahi ngāue fakalakalaka fakakomiuniti ʻoku fengaueʻaki ai ʻa e ongo fonua. ʻOku tui ʻa e kautahá ko e femahinoʻaki mo e feongoongoi ʻoku ne fakalahi ʻa e monūʻia mo e fakalakalaka ʻa e kakai, pea fakasi’isi’i ai ‘a e fesiosiofaki, taaufehi’a moe ta’efemahino’aki.

Ngaahi Taumuʻa Tu’uma’u

1. Fakalahi ʻa e Fetuʻutaki mo e Feohi Fakakaumeʻa
ʻE fakatupulaki ʻe he TCFA ʻa e fetuʻutaki lelei, feohi fakakaumeʻa mo e talanoa ʻi he vahaʻa ʻo e kakai mo e ngaahi kautaha ʻi he Kakai ʻo Siaina mo Tonga, ʻo fakafou ʻi he:

• Ngaahi ʻaʻahi fakafonua,
• Ngaahi fakataha,
• Ngaahi fakamatala he ongoongo mitia,

2. Poupouʻi ʻa e Fetuʻutaki Fakaʻekonomika mo Fakasosiale  pe Sosaieti Sivile
ʻE poupouʻi ʻe he TCFA ʻa e fengaueʻaki ʻoku ʻaonga ki he ongo fonua ʻi he ngaahi tafaʻaki ko ʻeni:

1. Fefakatauʻaki mo e ʻInivesimeni – tokanga ki he ngaahi poloseki fakalakalaka ʻi he takimamata, ngoue mo e toutai.
2. Ako – tokanga ki he ngaahi sikolasipi, ngaahi maʻuʻanga tokoni fakakolo mo e ngaahi polokalama moe naunau ako ma’ae fanau ako.
3. Toʻutupu – tokanga ki he ngaahi polokalama ʻi he sipoti mo e ngaahi faiva mo e ngaahi ngāue fakaʻatí.
4. Moʻui Lelei – tokanga ki he ngaahi maʻuʻanga tokoni, meʻangāue mo e ngaahi sikolasipi ʻi he tafaʻaki ʻo e moʻui.
5. Maluʻi ʻo e ʻAtakai – tokanga ki hono langa hake ʻa e malava ke matuʻuaki ʻa e ngaahi liliu ʻo e ʻea mo e ngaahi fakatamaki fakanatula, kae pehe ki he ivi fakanatula (hange koe Sola) ke holoki e fakafalala ki he lolo he ma’um’anga ivi faka’uhila.
6. Fakalakalaka ʻo e Nofoʻanga mo e Kolo – tokanga ki hono fokotuʻu mo fakalahi ʻa e ngaahi fetuʻutaki ʻo e Sister Cities pe ngaahi kolo tokoua, ‘e lava ke fakaivia ai ‘a e ngaahi fiema’u fakakolo ‘a Tonga.

3. Fakalahi ʻa e Fefakatauʻaki Fakafonua
ʻE fakatupulaki ʻe he TCFA ʻa e ngaahi fefakatauʻaki fakafonua ʻi he vahaʻa ʻo e ngaahi kautaha sosaieti sivile moe ngaahi kautaha pisinisi ʻi Tonga mo Kakai ʻo Siaina, ʻo fakafou ʻi he:

1. Talitali mo fakaafeʻi ʻa e ngaahi kulupu pisinisi mo e ngaahi kulupu anga fakafonua mei Siaina ki Tonga, pea mo tokoni ki he ngaahi ʻaʻahi fefakafetongiʻaki ʻa e kau Tonga ki Siaina.
2. Fakaafeʻi ʻa e ngaahi kulupu faiva mo e kau faʻu fakaʻatí mei Siaina ke nau ʻaʻahi ki Tonga, pea pehē foki ki he kau faiva mo e kau faiva Tonga ke nau ʻaʻahi ki Siaina.
3. Siponisa mo poupouʻi ʻa e ngaahi fakaʻaliʻali, ngaahi ʻaʻahi fakakaumeʻa mo e ngaahi polokalama fefakafetongiʻaki ʻi he vahaʻa ʻo Tonga mo Siaina.

Fa’unga Pule ‘o e TCFA

ʻOku foaki ʻe he kau memipa ʻo e TCFA honau taimi ke tokoni ki hono fakahoko ʻa e vīsone mo e ngaahi taumuʻa ʻo e kautahá, ʻo fakafou ʻi he ngaahi poloseki kehekehe ʻoku fakatefito ʻi hono:

• Fakafe’iloaki mo fakamaama ʻa e kakai ki he ngaue ‘a e kautaha;
• Poupouʻi ʻa e fengaueʻaki ‘a e ongo fonua fakatatau ki he fiema’u ‘a Tonga;
• Fokotuʻu mo fakalahi ʻa e ngaahi kolo tokoua (Sister Cities);
• Fakalakalaka ʻa e femahino’aki e ngaahi komiuniti ʻi Tonga mo Siaina.

ʻOku ʻi ai ʻa e fokotuʻutuʻu pule ʻo e TCFA ʻoku fokotuʻutuʻu ʻi he ngaahi tuʻunga pule ʻe tolu.

1) PATALONI – Fakalakalaka ‘o e Fetu‘utaki mo e Ngaahi Taumu‘a Ngaue ‘a e TCFA

• Pataloni/Sea: Ko Ta’ahine Pilinisesi Pule, Salote Mafile‘o Pilolevu Tuita.

• ‘Oku fakamu‘omu‘a ‘e he TCFA ‘a hono fakamālohia mo fakatupulaki ‘a e ngaahi fetu‘utaki fakakaume‘a ‘i he vaha‘a ‘o e kakai ‘o Tonga mo Siaina kamata pe ‘i Tonga ni, pea mo hono poupou‘i ‘a e fengaue‘aki ‘i he vaha‘a ‘o e ongo fonua.

2) POATE – Ngaahi Tu’utu’uni Ngaue mo e Pule‘i ‘o e Ngaahi Ngāue ‘a e TCFA

• Ko e Poate ‘o e TCFA ‘oku ne fokotu‘utu‘u mo tataki ‘a e ngaahi ngaue ‘a e kautaha, pea ‘oku ne tokanga‘i fakalukufua e ngaahi ngāue mo e taumu‘a ‘a e TCFA.

• ‘Oku kau ‘i he Poate TCFA ha tokolahi tatau ‘o e kau memipa Tonga mo e kau memipa Siaina (toko 22 fakalukufua kau Memipa Poate), ‘a ia ‘oku nau fakalele fakataha ‘a e visone mo e ngaahi taumu‘a ‘a e kautaha. ‘Oku fakahoko eni fakafou ‘i he ngaahi alea, ngaahi polokalama, mo e ngaahi me‘a ‘oku fokotu‘utu‘u ke ne fakatupulaki ‘a e mahino fakafetu‘utaki, kaungame‘a fakangaue, mo e fefalala‘aki ‘i he vā fakalotofonua mo fakavaha‘apule‘anga ‘i he vaha‘a ‘o Tonga mo Siaina.

3) KOMITI – Ko e tafaʻaki fakangāue ia ʻo e TCFA, ʻa ia ʻoku ne fakahoko ʻa e ngaahi fakahinohino ʻa e Pataloni mo e Poate ʻo e TCFA.

Komiti Ngāue: ʻOku kau ki ai ʻa e kau memipa Poate ʻe toko fā (4) moe kau Memipa toko 18 ʻoku nau taki ʻa e ngaahi komiti kehekehe. Ko honau fatongia ke fakahoko ʻa e ngaahi fakahinohino mei he Pataloni mo e Poate, pea ke tulituli mo fakahoko ʻa e ngaahi fokotuʻutuʻu kuo tali, ke lava ʻo aʻusia ki he ngaahi taumuʻa mo e visone ʻa e TCFA.